રાજ્યમાં વાહન ચાલકો નિયમોને નેવે મુકીને બેફામ ડ્રાઈવિંગ કરી રાહદારીઓ માટે જોખમી બની રહ્યા છે. દિવાળીના તહેવાર ટાણે અમદાવાદમાં એક બાળકીને ટ્રક ચાલકે અડફેટે લેતા અરેરાટી મચી ગઈ છે. આ હ્રદયદ્વાવક ઘટના અમદાવાદના કાંકરિયા રેલવે યાર્ડ નજીક બની છે. બાળકીના મોતના સમાચાર સામે આવતા જ પરિવારજનો પર તો જાણે આભ તુટી પડ્યું છે, તેમના કરૂણ આક્રંદથી માહોલ ગમગીન બની ગયો છે.

હેવાન ટ્રક ચાલકે બાળકીને કચડી નાખી

અમદાવાદના કાંકરિયા રેલવે યાર્ડ નજીક ગમખ્વાર અકસ્માત સર્જાયો હતો. ટ્રક ડ્રાઈવરે રેલવે યાર્ડમાં ટ્રક ઘુસાડતા એક અઢી વર્ષની બાળકીને અડફેટે લીધી હતી. બેફામ બનેલા ટ્રક દ્વારા બાળકીને કચડવાની ઘટના સામે આવતા લોકોમાં ભારે રોષ જોવા મળ્યો હતો. જેના કારણે ઘટના સ્થળે જ અન્ય લોકોએ ડ્રાઈવરની મારપીટ કરી હતી. આ બાદ, ઇજાગ્રસ્ત ડ્રાઈવરને હોસ્પિટલ ખેસડવામાં આવ્યો હતો. ઘટનાની જાણ થતાં જ પોલીસ ઘટના સ્થળે પહોંચી ગઈ હતી અને વધુ તપાસ માટે કાર્યવાહી હાથ ધરી હતી.