ગુજરાતમાં દારૂબંદી છે આ વાક્ય જ્યારે વાંચતા હશે ત્યારે કટાક્ષ વાળી સ્માઈલ તમારા ચહેરા પર આવી જતી હશે.. એવું કહેશો કે આ વાત કહીને તમે મજાક કરી રહ્યા છો..! દારૂબંદીના કાયદાનો કેટલો અમલ થાય છે તે આપણે જાણીએ છીએ. રોજે એટલા કિસ્સાઓ આપણી સામે આવતા હોય છે જેમાં આ કાયદાનો ભંગ સરેઆમ થતો હોય છે. અનેક વખત તો જેની પર આ કાયદાનું પાલન કરવાની જવાબદારી હોય છે તે જ કાયદાનો ભંગ કરતા નજરે પડે છે. ત્યારે એક કિસ્સો અમદાવાદથી સામે આવ્યો છે જેમાં પોલીસ કર્મી નશાની હાલતમાં જોવા મળે છે. એક વીડિયો વાયરલ થયો છે જેમાં પોલીસકર્મી ગાડીની આગળની સિટ પર ઉંઘી રહ્યા છે અને પાછળની સીટ પરથી દારૂની બોટલ મૂકેલી દેખાય છે.

પીધેલી હાલતમાં દેખાયો પોલીસકર્મી!

સોશિયલ મીડિયા પર અનેક એવા વીડિયો વાયરલ થતા હોય છે જેમાં કોઈ વ્યક્તિ દારૂના નશામાં દેખાતો હોય છે. નશાની હાલતમાં તેને ખબર નથી હોતી કે તે શું કરી રહ્યા છે. અનેક પોલીસકર્મીઓ પણ દારૂના નશામાં દેખાય છે. વર્દીમાં હોય અને પીધેલી હાલતમાં હોય તેવા પણ અનેક કિસ્સાઓ આપણી સામે હશે. ત્યારે એક કિસ્સો અમદાવાદથી સામે આવ્યો છે જેમાં ગાડીમાં પોલીસકર્મી પીને ઢેં થઈ ગયા છે. આ મામલે પોલીસે વધુ તપાસ હાથ ધરી છે. મળતી માહિતી અનુસાર ગાડીમાં સૂતેલા પોલીસ કર્મી આનંદનગર પોલીસ સ્ટેશનમાં ફરજ બજાવે છે. 

પોલીસની છબી આવા કિસ્સાઓથી થાય છે વધારે ખરાબ!

પોલીસ આપણી સુરક્ષા માટે હોય છે પરંતુ અનેક વખત પોલીસકર્મી દ્વારા કરવામાં આવતો વ્યવહાર, પોલીસ કર્મીઓનો વાયરલ થતો વીડિયો આપણા મનમાં પોલીસની છબીને ખરાબ કરે છે. પોલીસને જોતા લાગે કે પોલીસ હમણાં દાદાગીરી કરશે ગેરવર્તન કરશે વગેરે વગેરે...! આવા પોલીસ હોય છે એની ના નહીં પરંતુ સારા પોલીસ પણ હોય છે જે પોલીસની છબીને સારી રાખતા હોય છે. તેમને જોઈ આપણો અભિગમ પોલીસ પ્રત્યે બદલાઈ જાય. પ્રશ્ન એ થાય કે જેની પર સુરક્ષાની જવાબદારી છે, કાયદાનું પાલન કરાવાની જવાબદારી છે તે જ કાયદાનો ખુલ્લેઆમ ભંગ કરશે તો પોલીસની છબી વધારે ખરાબ થશે તે નક્કી છે!