રાષ્ટ્રગીતને સન્માન આપવું આપણા સૌ કોઈનું કર્તવ્ય છે. જ્યારે રાષ્ટ્રગીત ગવાતું હોય તે દરમિયાન અનેક નિયમોનું પાલન કરવું પડતું હોય છે. ત્યારે સોશિયલ મીડિયા પર એક વીડિયો વાયરલ થઈ રહ્યો છે જેમાં કેટલાક લોકો ખુરશી પર બેઠા બેઠા રાષ્ટ્રગીત ગાઈ રહ્યા છે. વીડિયોમાં 11 જેટલા લોકો જોવા મળી રહ્યા છે જેમાં ભાજપના આગેવાન પણ દેખાઈ રહ્યા છે. સોશિયલ મીડિયા પર આ વીડિયો વાયરલ થતા ભરૂચ બી ડિવિઝન પોલીસને જાણ થતાં પોલીસે જાતે જ ફરિયાદી બની વીડિયોમાં દેખાતા તમામ 11 લોકો વિરૂદ્ધ ગુન્હો નોંધ્યો છે.

પોલીસે ફરિયાદી બની નોંધાવી ફરિયાદ   

સોશિયલ મીડિયા પર અનેક વીડિયો વાયરલ થતાં હોય છે જે ટોક ઓફ ધી ટાઉન બનતા હોય છે. ત્યારે હાલ ભરૂચનો એક વીડિયો વાયરલ થઈ રહ્યો છે જેમાં 11 લોકો રાષ્ટ્રગીત દરમિયાન પાલન કરવામાં આવતા નિયમોનું ઉલ્લંઘન કરી રહ્યા છે. મંડપમાં બેઠા બેઠા  રાષ્ટ્રગીત ગાતા હતા. મળતી માહિતી અનુસાર આ વીડિયો ભરૂચ શહેરના પશ્ચિમ વિસ્તારનો છે. જ્યાં રહેતા ઐયુબ ઈબ્રાહિમ પટેલની પુત્રીનો રાત્રીના સમયે લગ્ન પ્રસંગ યોજાયો હતો. જેમાં ભાજપના આગેવાનો કાર્યકરો સહિત 11 જેટલા લોકો મંડપમાં જ રાષ્ટ્રગીત ગાવાનું શરૂ કર્યું હતું. પાંચ શખ્સોએ ખુરશીમાં બેઠા બેઠા જ્યારે બાકીના પાંચ લોકો સાવધાન અવસ્થામાં ઉભા રહ્યા વિના રાષ્ટ્રગીત ગાઈ રહ્યા હતા. આ વીડિયો સોશિયલ મીડિયા પર વાયરલ થતા ભરૂચ બી ડિવીઝન પોલીસે જાતે જ ફરિયાદી બની વીડિયોમાં દેખાતા લોકો વિરૂદ્ધ કાર્યવાહી કરી છે. 

વીડિયો સાથે છેડછાડ નથી કરાઈને તે અંગે કરાઈ રહી છે તપાસ 

જે મોબાઈલમાં રેકોર્ડિંગ કરવામાં આવ્યું હતું તેને કબજે કરી પોલીસે કાર્યવાહી શરૂ કરી છે. પ્રાથમિક તબક્કે તમામની અટકાયત કરી હતી તે ઉપરાંત મોબાઈલને એફએસએલમાં મોકલી દેવામાં આવ્યા છે. વીડિયો સાથે કોઈ છેડછાડ કે અન્ય કૃત્ય થયુ નથી તે અંગેનો રિપોર્ટ આવ્યા બાદ કાર્યવાહી હાથ ધરવામાં આવશે. આ વીડિયોમાં ભરૂચના ભાજપના લઘુમતિ મોરચાના અગ્રણી ઈમરાન ખંડરા દેખાય છે. આ વીડિયો વાયરલ થતા કોઈ નક્કર કાર્યવાહી કરવામાં આવે તેવી માગ કરવામાં આવી રહી છે.