ગુજરાતમાં ચૂંટણીને લઈ માહોલ જામ્યો છે. દરેક પાર્ટી પોતાની પાર્ટીનો પ્રચાર કરવામાં વ્યસ્ત બની છે. અમિત શાહ ગુજરાતની મુલાકાતે છે. નવા વર્ષના દિવસે હાર્દિક પટેલે અમિત શાહ સાથે મુલાકાત કરી હતી. ત્યારે સોશિયલ મીડિયા પર કોંગ્રેસમાંથી ભાજપમાં જોડાનાર હાર્દિક પટેલ અને અમિત શાહની મુલાકાતનો ફોટો વાયરલ થઈ રહ્યો છે. આ ફોટો વાયરલ થતા અનેક તર્ક વિતર્ક ઉભા થઈ રહ્યા છે.

અમિત શાહ અને હાર્દિક પટેલનો ફોટો વાયરલ

ભાજપે વિધાનસભા ચૂંટણીને લઈ ઉમેદવારોના નામ જાહેર નથી કર્યા. ભાજપ દ્વારા આ અંગે પ્રક્રિયા હાથ ધરવામાં આવી છે. આ વખતે કોને ટિકિટ મળશે તે અંગે કોઈ નિર્ણય લેવામાં આવ્યો નથી. ત્યારે નવા વર્ષના દિવસે હાર્દિક પટેલે અમિત શાહ સાથે શુભેચ્છા મુલાકાત કરી હતી. વાયરલ ફોટામાં અમિત શાહ હાર્દિક પટેલની ભેટ સ્વીકારતા નજરે પડી રહ્યા છે. ભાજપમાં જોડાયા બાદ અમિત શાહ અને હાર્દિક પટેલની પ્રથમ મુલાકાત છે.

ભાજપના કાર્યકર્તા અને હોદ્દેદારો સાથે કરી નવા વર્ષની ઉજવણી

ચૂંટણી પૂર્વે વિરમગામમાં જઈ હાર્દિક પટેલ કાર્યક્રમોમાં ભાગ લઈ રહ્યા છે. વિરમગામ બેઠક પરથી ચૂંટણી લડવા તેઓ આતુર હોય તેવું લાગે છે. નવા વર્ષના પ્રથમ દિવસે અમિત શાહના નિવાસ સ્થાને અનેક નેતાઓએ તેમની મુલાકાત લીધી હતી. ત્યારે આ સમયે હાર્દિક પટેલે તેમની શુભેચ્છા મુલાકાત કરી હોય તેવું હાલ ચર્ચાઈ રહ્યું છે.