પ્રધાનમંત્રી નરેન્દ્ર મોદીનો જ્યારે ભાષણ કરી રહ્યા હતા ત્યારે એક વ્યક્તિ કાર્યક્રમના મંડપના બોલ્ટ ખોલી રહ્યો હતો, વીડિયો વાયરલ થતાં જાણ થઈ હતી. પોલીસે ખોલનારા વ્યક્તિની ધરપકડ કરી છે. આ વ્યક્તિનું નામ સેધા રાજગોર છે જે બનાસકાંઠાના ઈઢાટા ગામનો વતની છે. 

બોલ્ટ ખોલનાર સેધા રાજગોર ઈઢાટા ગામનો વતની

પ્રધાનમંત્રી નરેન્દ્ર મોદીનો ગુજરાતના બનાસકાંઠા જિલ્લાના થરાદ તાલુકામાં કાર્યક્રમ હતો. આ કાર્યક્રમમાં પ્રધાનમંત્રી મોદીએ 8 હજાર કરોડથી વધુ રૂપિયાના વિકાસકાર્યોનું શિલાન્યાસ કર્યો હતો. પ્રધાનમંત્રી નરેન્દ્ર મોદીએ બનાસકાંઠાના થરાદમાં ભાષણ આપી લોકો સાથે સંવાદ કર્યો હતો. પ્રધાનમંત્રી મોદી જ્યારે ભાષણ કરી રહ્યા હતા તે દરમિયાન એક અજાણ્યો શખ્સ કાર્યક્રમમાં જે મંડપ બાંધ્યો હતો ત્યાંના પોલ પરથી બોલ્ટ કાઢી રહ્યો હતો. હવે આ વ્યક્તિ કયા કારણથી બોલ્ટ કાઢી રહ્યો હતો તે કુતૂહલ હતું. અંતે બનાસકાંઠા પોલીસે તેમની ધરપકડ કરી છે. બોલ્ટ ખોલતો વ્યક્તિ સેધા રાજગોર  ઈઢાટા ગામનો વતની છે. પોલીસ હવે આ વ્યક્તિની પૂછપરછ કરશે અને પૂછશે કે તે શું કરવા ઈચ્છતો હતો.