નવસારીના વાંસદા વિધાનસભા બેઠકના કોંગ્રેસના ધારાસભ્ય અનંત પટેલને વર્ષ 2017માં નવસારીની કૃષિ યુનિવર્સિટીમાં પ્રધાનમંત્રી નરેન્દ્ર મોદીનો પોટો ફાડી નાખતા IPC કલમ 447 અંતર્ગત  કોર્ટમાં દોષિત જાહેર કરવામાં આવ્યા છે.  

નરેન્દ્ર મોદીના નામ પર વધુ એક કોંગ્રેસ નેતાને સજા

નવસારીની કૃષિ યુનિવર્સિટીમાં 2017માં વિદ્યાર્થીઓએ હડતાળ કરી હતી. તે સમયે યુનિવર્સિટીના કુલપતિની ચેમ્બરમાં અનંત પટેલ, યશ દેસાઈ, પાર્થિવરાજસિંહ અને પિયૂષ થિમ્મર નામના યુથ કોંગ્રેસના કાર્યકરોએ વિરોધ નોંધાવ્યો હતો. દરમિયાન 2017માં અનંત પટેલે નવસારી કૃષિ યુનિવર્સિટીમાં પ્રધાનમંત્રી નરેન્દ્ર મોદીનું પોસ્ટર ફાડ્યું હતું. જેના કારણે કૃષિ યુનિવર્સિટીના કુલપતિ તરફથી જલાલપુર પોલીસ સ્ટેશનમાં IPC 143, 353, 427,447 મુજબની ફરિયાદ નોંધવામાં  આવી હતી. પોલીસે ભારતીય દંડ સંહિતાની કલમ 447 મુજબ ફરિયાદ નોંધી હતી. આ કલમ મુજબ જે કોઈ વ્યક્તિ ગુનાહિત અપરાધ કરે છે તેને વધુમાં વધુ 3 મહિનાની જેલ અને 500 રૂપિયાનો દંડ થાય છે. ગુનાની ગંભીરતા જોતા કોર્ટ નક્કી કરતી હોય છે ક્યારેક બંને અંતર્ગત પણ સજા અપાતી હોય છે. 

કોર્ટે અનંત પટેલને 1 રૂપિયો આપ્યો

જો કે કોંગ્રેસના નેતા અનંત પટેલને કોર્ટે 99 રૂપિયાનો દંડ ફટકાર્યો. આ દરમિયાન કોર્ટની કામગીરી પણ જોવા જેવી હતી કારણ કે 99 રૂપિયાના દંડ સામે ધારાસભ્ય અનંત પટેલે 100 રૂપિયાની નોટ જમા કરાવી તો 1 રૂપિયો તેને પાછો આપવામાં આવ્યો હતો. કોર્ટે અનંત પટેલ, યશ દેસાઈ, પાર્થિવરાજસિંહ અને પિયૂષ થિમ્મરને પણ દોષિત જાહેર કર્યા છે.