ગુજરાતમાં આગામી મહિનામાં વિધાનસભા ચૂંટણી યોજાવાની છે. પાર્ટીનો પ્રચાર કરવા અનેક સ્થળો પર બેનર લાગ્યા છે. અને અનેક સ્થળો પર ઉમેદવારો પોતે જઈ પ્રચાર કરી રહ્યા છે. ત્યારે વોટ માંગવા જ અનેક ઉમેદવારો પોતાના મતવિસ્તારમાં આવતા હોય છે તેવા આક્ષેપો સ્થાનિક દ્વારા કરવામાં આવી રહ્યો છે. મત માટે મતવિસ્તારમાં આવતા કોંગ્રેસના ધારાસભ્યને કડવો અનુભવ થયો છે. દાણીલીમડા વિસ્તારમાં કોંગ્રેસના ધારાસભ્યનો વિરોધ સ્થાનિકોએ કર્યો હતો.

ધારાસભ્ય પાસેથી લોકોએ માગ્યો કામનો હિસાબ 

ચૂંટણી નજીક આવી રહી છે તેમ તેમ ઉમેદવારો પોતાના મતવિસ્તારમાં મત માગવા જાય છે. અનેક વખત ધારાસભ્યોને વિરોધનો સામનો કરવો પડે છે. આવો જ વિરોધનો સામનો  દાણીલીમડાના કોંગ્રેસના ધારાસભ્ય શૈલેષ પરમારને કરવો પડ્યો છે. દાણીલીમડા કોંગ્રેસના કાર્યકર્તાનું સંમેલન યોજ્યું હતું. જેમાં સ્થાનિક લોકોએ ધારાસભ્યનો વિરોધ કર્યો હતો. સ્થાનિકોનું કહેવું છે કે ધારાસભ્ય છેલ્લા પાંચ વર્ષમાં દેખાયા જ નથી. 

ઉમેદવારોને કરવો પડે છે સ્થાનિકોના વિરોધનો સામનો  

ઉલ્લેખનીય છે કે અનેક ધારાસભ્યો એવા હોય છે જે ચૂંટણી સમયે જ મતદારો વચ્ચે પહોંચતા હોય છે. મતદારોને રિઝવવા અનેક વખત ધારાસભ્યો મતદાન પૂર્ણ ન થાય ત્યાં સુધી મતદાતાઓની વચ્ચે રહે છે પરંતુ ચૂંટણી પૂર્ણ થતા જ તેઓ પાછા દેખાતા જ નથી. ત્યારે અનેક વખત ધારાસભ્યોને સ્થાનિક લોકોનો વિરોધ સહન કરવો પડે છે.