લોકસભા ચૂંટણીને લઈ એક તરફ તૈયારીઓ ચાલી રહી છે તો બીજી તરફ પોતાની પડતર માગણીઓને લઈ સરકારી કર્મચારીઓએ સરકાર સામે બાંયો ચઢાવી લીધી છે. એક તરફ દિલ્હીમાં કિસાન આંદોલનને લઈ ચક્કાજામ સર્જાયો છે તો હવે ગાંધીનગરમાં ૯ મી માર્ચથી જૂની પેન્શન યોજનાને લઈ સરકારી કર્મચારીઓ સરકાર સામે વિરોધ દર્શાવાના છે.   વિવિધ પડતર પ્રશ્નો માટે આંદોલન વધુ તેજ બનાવાયું છે . તમને જાણીને નવાઈ લાગશે કે , RSS સાથે જોડાયેલી શૈક્ષણિક સંઘ દ્વારા આ આંદોલન ચલાવાઈ રહ્યું છે . સત્યાગ્રહ છાવણીમાં આજે વિરોધ પ્રદર્શન થવાનું છે. 

એક લાખ શિક્ષકો અને કર્મચારી કરશે સત્યાગ્રહ છાવણીમાં આંદોલન! 

અનેક વખત એવું બનતું હોય છે કે આંદોલન સમેટાઈ જાય માટે સરકાર દ્વારા વચનો આપવામાં આવતા હોય છે. સરકાર દ્વારા પડતર માગણીઓ પણ સ્વીકારી લેવામાં આવતી હોય છે. ત્યારે જૂની પેન્શન યોજનાને લઈને પણ આવું જ કંઈક થયું. અગાઉ સરકારે જૂની પેન્શન યોજના સહિતના પડતર પ્રશ્નો અંગે ગેરંટી આપી હતી , જે ગેરંટી પુરી ન કરતા રાજ્યભરના કર્મચારીઓ ૯ મી માર્ચે ગાંધીનગરના સત્યાગ્રહ છાવણીમાં આંદોલન કરવાના છે. આંદોલનના ભાગરૂપે ૧ લાખ શિક્ષકો અને કર્મચારીઓ ભેગા થઈ મહાપંચાયત કરશે .

ભગવા વસ્ત્રો, ખેસ પહેરીને કર્મચારીઓ નોંધાવશે વિરોધ!

આપને જણાવી દઈએ કે શિક્ષકો અને કર્મચારીઓએ પડતર પ્રશ્નોને લઈ  ગઈકાલે વિરોધ દર્શાવ્યો હતો. શિક્ષકોએ ચોક વિના જ વાર્તા અને ગીતો મારફતે બાળકોને શિક્ષણ આપી વિરોધ કર્યો હતો . ચોક અને પેનનો ઉપયોગ પણ ટાળ્યો હતો , અને વિદ્યાર્થીઓની હાજરી મોકલવી અને શિક્ષણ સિવાયની કામગીરીનો બહિષ્કાર કર્યો હતો . હવે ૯ મી માર્ચે એટલે કે આજે ગાંધીનગરમાં મહાપંચાયતનું આયોજન કરવામાં આવ્યું છે. આ મહાપંચાયતમાં ૧ લાખ કરતા વધુ શિક્ષકો ભગવા વસ્ત્રો , ખેસ , જય શ્રીરામની પતાકા અને સાફા પેહરી ગાંધીનગર પહોંચશે . આ શિક્ષકો સરકારને અનેક વખત રજુઆત કરી ચુક્યા છે , પરંતુ સરકાર ટસથી મસ થવા તૈયાર નથી . 

પડતરની માગણીઓ અંગે વાત કરીએ તો.... 

સરકાર સામે બાંયો ચઢાવીને બેઠેલા સરકારી કર્મચારીઓની માગ છે કે તમામ કર્મચારીઓ માટે OPS એટલે કે જૂની પેન્શન યોજના લાગુ કરાય, સરકાર સાથે થયેલા સમાધાન મુજબ ૧-૪-૨૦૦૫ પહેલાના નિયુક્ત શિક્ષક અને કર્મચારીઓનો OPSમાં સમાવેશ કરવામાં આવે , સાતમા પગારપંચ મુજબ તમામ પ્રકારના ભથ્થા તથા લાભ આપવામાં આવે , જુના શિક્ષકોની ભરતીના નિયમોને બદલવામાં આવે , નવી પેન્શન યોજનાવાળા શિક્ષકોને ૩૦૦ રજાના રોકડ રૂપાંતરનો લાભ આપવો. 

તે સિવાય કોન્ટ્રાક્ટ-ફિક્સ પગાર બંધ કરી જ્ઞાન સહાયકની જગ્યાએ કાયમી શિક્ષકોની ભરતી કરવી , પ્રાથમિક સંવર્ગની માતૃશક્તિને ૨૨-૪-૨૦૨૨ ના માતૃત્વ રજાના ઠરાવમાં સુધારો કરવો , ૧૯૯૭થી અત્યારસુધી તથા હવે જોડનાર ફિક્સ પગારીને રજાઓની કપાત ન ગણી ઉચ્ચતર પગાર ધોરણનો લાભ આપવો , HTAT મુખ્ય શિક્ષકોના બદલીના નિયમો ઝડપથી બહાર પાડવા આ સાથે તેમની અન્ય માંગો પણ છે .