આપણી બંધારણીય સંસ્થા ગુજરાત પબ્લિક સર્વિસ કમિશન એટલેકે , GPSCને ગુજરાતની વડી અદાલત દ્વારા વેધક ટિપ્પણીઓ કરવામાં આવી છે. જેમાં ગુજરાત હાઇકોર્ટે GPSCને આપખુદ ગણાવી છે. આ ઉપરાંત, GPSCના પેપર સેંટરને લઇને ફરી સવાલ ઉભા થયા છે. હવે હાઇકોર્ટે GPSCને પેપર સેંટરના નામ પણ ડિસ્કલોઝ કરવાનો આદેશ આપ્યો છે. "આ કેસ તમારા આપખુદશાહી એટલેકે , ઓટોક્રેસીનો છે." આ શબ્દો છે , ગુજરાત હાઇકોર્ટના જજ નિર્ઝર એસ દેસાઈના. સ્ટેટ ટેક્સ ઇન્સ્પેકટરની પરીક્ષામાં એક સવાલને લઇને ઉમેદવારે હાઇકોર્ટના દરવાજા ખખડાવ્યા છે. આખો મામલો , GPSCની પરીક્ષામાં પુછાયેલા "કૌટિલ્યના" પ્રશ્ર્નનો છે. ઉમેદવારે પિટિશન કરી છે કે , તેનો જવાબ સાચો છે પરંતુ GPSCએ તેને ખોટો ગણાવ્યો છે.

 જજ નિર્ઝર એસ દેસાઈએ GPSCને લઇને ટિપ્પણી કરતા કહ્યું છે કે " આ પ્રશ્ન પાછળ ઓરીજીનલ સોર્સ એટલેકે , બુક ક્યાં છે? તમારી પાસે છે કે નહિ? જો તમારી પાસે ઓરીજીનલ સોર્સ નથી તો એફિડેવિટ દાખલ કરો. તમે ઉમેદવારોના ભવિષ્ય સાથે ખિલવાડ કરી રહ્યા છો. આ ઉપરાંત , પેપર સેંટરનું નામ પણ હવે ડિસ્કલોઝ કરો. આ કેસ તમારી આપખુદશાહી એટલેકે ઓટોક્રેસીનો છે. GPSC દરેક વખતે આ પેપર સેટ કરવામાં ગોટાળા કરે છે. દરેક વખતે લોકોએ કોર્ટમાં આવવું પડે છે." આમ GPSCને ખુબ વેધક સવાલો જજ નિર્ઝર એસ દેસાઈ દ્વારા પુછાયા છે. 

જજ નિર્ઝર એસ દેસાઈ દ્વારા આ મામલે , GPSCના વકીલને પ્રશ્ન કરાયો કે તમારી પાસે સોર્સ કયો છે ત્યારે , વકીલ જવાબ નહોતા આપી શક્યા આ પછી , જજ નિર્ઝર એસ દેસાઈએ ઓરીજીનલ સોર્સ રજૂ કરવા માટે એફિડેવિટ દાખલ કરવા આદેશ આપ્યો છે. આ કેસમાં આગામી સુનાવણી હવે ૨૦મી તારીખે હાથ ધરાશે. આમ ગુજરાત હાઇકોર્ટનું આ વલણ હજારો વિદ્યાર્થીઓ માટે આશાનું એક કિરણ બનીને ઉભર્યું છે. અહીં એક બીજી વસ્તુ દર્શકમિત્રો , આપને જણાવવી છે કે, GPSCના બોર્ડમાં મંજુર સંખ્યાબળ ૭ સભ્યોનું છે. પણ અત્યારે બોર્ડમાં પાંચ જગ્યાઓ ખાલી છે. બીજા રાજ્યોની વાત કરીએ તો , કેરળમાં ૨૧ સભ્યોનું , તમિલનાડુમાં ૧૫ સભ્યોનું , રાજસ્થાનમાં ૧૧ સભ્યોનું , કર્ણાટક અને ઉત્તરપ્રદેશમાં ૯ સભ્યોનું બોર્ડ અસ્તિત્વમાં છે. GPSCએ તાત્કાલિક ધોરણે , બોર્ડમાં જરૂરી સભ્યોની નિમણુંક કરીને , બીજા રાજ્યોના પબ્લિક સર્વિસ કમિશન પાસેથી શીખવું જોઈએ.