રાજ્યમાં છેલ્લા બે દિવસથી અનરાધાર વરસાદ થઈ રહ્યો છે, સતત અને ભારે વરસાદથી લોકો પણ ત્રાહિમામ પોકારી ગયા છે. જો કે હજુ થોડા દિવસ મુશળધાર વરસાદથી રાહત મળવાની કોઈ શક્યતા જોવા મળતી નથી. હવામાન વિભાગ દ્વારા રાજ્યમાં 24 કલાક ભારે રહેવાની સંભાવના વ્યક્ત કરીને સૌરાષ્ટ્ર તથા દક્ષિણ ગુજરાતમાં ભારેથી અતિભારે વરસાદ અને ક્યાંક અત્યંત ભારે વરસાદ થવાની શક્યતાઓ પણ છે. 23 અને 24 તારીખે વરસાદનું જોર ગુજરાત પર રહ્યા બાદ સિસ્ટમ દૂર થવાથી વરસાદ ઘટી જવાની શક્યતાઓ વ્યક્ત કરવામાં આવી છે. હવામાન વિભાગે આજે પણ સૌરાષ્ટ્ર અને દક્ષિણ ગુજરાતના ભાગોમાં ભારે વરસાદ ખાબકવાની શક્યતાઓ વ્યક્ત કરી છે. આજે પણ રાજ્યમાં રેડ અને ઓરેન્જ અલર્ટ આપવામાં આવ્યું છે, રાજકોટ, દ્વારકા, ભાવનગર, વલસાડ, દમણ અને, દાદરા નગર હવેલીમાં રેડ અલર્ટ જાહેર કરાયું છે. આજે અને આવતીકાલે ભારેથી અતિ ભારે વરસાદ રહેશે.

#WATCH गुजरात: भारी बारिश के कारण जूनागढ़ के कुछ इलाकों में जलभराव हुआ। pic.twitter.com/TUhr4WQUkq

— ANI_HindiNews (@AHindinews) July 23, 2023

આ જિલ્લામાં ઓરેન્જ અને યલો એલર્ટ

આગામી 24 કલાક માટે અત્યંત ભારે વરસાદની શક્યતાઓ પણ છે. જેમાં જુનાગઢ, દેવભૂમિ દ્વારકા, ભાવનગરનો સમાવેશ કરાયો છે અહીં કેટલાક ભાગોમાં અત્યંત ભારે વરસાદ ખાબકી શકે છે. આ સિવાય દક્ષિણ ગુજરાતના વલસાડ તથા દમણ અને દાદરા નગર હવેલીમાં અત્યંત ભારે વરસાદ થવાની સંભાવનાઓ છે. કચ્છ, જામનગર, પોરબંદર, ગીર સોમનાથ, અમરેલી, સુરત, નવસારી, ભરૂચ, વડોદરા અને આણંદ માટે ઓરેન્જ એલર્ટ આપવામાં આવ્યું છે. અમદાવાદમાં પણ વરસાદના કેટલાક સ્પેલ ભારે થવાની શક્યતાઓ છે. આગામી ત્રણ દિવસ માછીમારોને દરિયો ન ખેડવા સૂચના આપવામાં આવી છે. આવતી કાલે મહેસાણા. બનાસકાંઠા. સાબરકાંઠા. દ્વારકા અને પોરબંદરમાં ઓરેન્જ એલર્ટ જ્યારે અમદાવાદ, ગાંધીનગર, એવલ્લી, નવસારી, વલસાડ, અને જૂનાગઢ ગીર સોમનાથમાં યલ્લો એલર્ટ આપવામાં આવી છે.

આજી નદી ગાંડીતુર બની

રાજકોટમાં શનિવારે ધોધમાર વરસાદ પડ્યો હતો. જેના કારણે અનેક વિસ્તારોમાં પાણી ભરાયા હતા. તો બીજી તરફ ઉપરવાસમાં પડેલા ભારે વરસાદના કારણે આજી નદી બે કાંઠે વહી રહી છે. જેના કારણે રામનાથ મહાદેવ મંદિર પાસે નદીમાં બીજી વખત ઘોડાપૂર આવ્યું છે.

આજી ડેમ 01 અને  ભાદર ડેમ 01 ઓવરફ્લો 

ભારે વરસાદના પગલે રાજકોટ શહેરને પૂરું પાડતો. આજી ડેમ 01 પણ ઓવરફ્લો થયો હતો. ત્યારે બીજી બાજુ સૌરાષ્ટ્રનો સૌથી મોટો બીજા નંબરનો ડેમ ભાદર ડેમ 01 પણ ઓવરફ્લો થયો હતો. ભાદર 01 ડેમ રાજકોટ, ગોંડલ, જેતપુર શહેરને પીવાનું પાણી પૂરું પાડે છે. નીચાણવાળા 30 જેટલા ગામોને તંત્ર દ્વારા એલર્ટ કરવામાં આવ્યા છે.

સરદાર સરોવર ડેમની જળ સપાટી  36 સેમી વધી

સરદાર સરોવર ડેમની જળ સપાટીમાં 18 કલાકમાં 36 સેમીનો વધારો થયો છે. ઉપરવાસમાંથી 89,555 ક્યુસેક પાણીની આવક થતાં સરદાર સરોવર ડેમમાં પાણીની સપાટી હાલ 127.86 મીટર છે. RBPH અને CHPHના તમામ પાવર હાઉસ ચાલુ કરાયા છે. નવા પાણીની આવક થતા સરદાર સરોવર ડેમ 80 ટકા ભરાયો છે.