એક તરફ ગુજરાતમાં દારૂબંધી હોવાની વાતો કરવામાં આવે છે તો બીજી તરફ એવા અનેક દ્રશ્યો સામે આવતા હોય છે જેમાં દારૂબંધી નિયમના લીરેલીરા ઉડતા હોય છે. સોશિયલ મીડિયા પર અનેક વીડિયો સામે આવતા હોય છે જેમાં દારૂની રેલમછેલ જોવા મળે છે. ત્યારે ફરી એક કિસ્સો રાજકોટથી સામે આવ્યો છે જેમાં લગ્ન પ્રસંગની ઉજવણી દરમિયાન નીકળતા ફુલેકામાં ગેંગસ્ટર અને તેના મિત્રો ખુલ્લેઆમ દારૂની મજા માણી રહ્યા છે. આ વીડિયો સોશિયલ મીડિયા પર વાયરલ થતા પોલીસે તપાસ શરૂ કરી છે.

ફિલ્મી ગીત પર દારૂની બોટલ સાથે ઝૂમ્યા લોકો! 

હાલ લગ્નની સિઝન ચાલી રહી છે. લગ્નની ઉજવણીના અનેક વીડિયો સામે આવતા હોય છે. ત્યારે રાજકોટથી એક વીડિયો સામે આવ્યો છે જેમાં લગ્ન પહેલા નીકળતા ફૂલેકામાં અનેક લોકો દારૂની મજા માણી રહ્યા છે. મળતી માહિતી અનુસાર રાજકોટ શહેરના ભક્તિનગર પોલીસ સ્ટેશન વિસ્તારમાં લગ્નનું આયોજન કરવામાં આવ્યું હતું જેમાં ફુલેકામાં કુખ્યાત ગેંગસ્ટર અને તેના મિત્રો ખુલ્લેઆમ શરાબી ગીત પર ડાન્સ કરી રહ્યા છે. તે ઉપરાંત વરરાજાના મિત્રોએ વરરાજાને બંદુક પણ આપી હતી જે બાદ ફાયરિંગ પણ કરવામાં આવ્યું હતું. આ વીડિયો સોશિયલ મીડિયામાં વાયરલ થઈ રહ્યો છે. ત્યારે પોલીસે પણ તેમને પકડી પાડ્યા છે. 

ફૂલેકામાં કરાયું હવામાં ફાયરિંગ!

જે વીડિયો વાયરલ થઈ રહ્યો છે તેમાં કુખ્યાત ગેંગસ્ટર અને તેના મિત્રો પીલે પીલે ગીત પર ઝૂમી રહ્યા છે. ગુજરાતમાં એક તરફ દારૂબંધી હોવાની વાતો કરવામાં આવે છે તો બીજી તરફ ખુલ્લેઆમ દારૂની પાર્ટી કરતા આવા વીડિયો સામે આવતા હોય છે જેને કારણે શું ગુજરાતમાં ખરેખર દારૂબંધી છે તેવા પ્રશ્નો ઉભા થાય છે. આ વીડિયો પોલીસ પાસે આવતા આ અંગે તપાસ કરવામાં આવી રહી છે. પોલીસે દારૂ પીતા અને હથિયાર રાખતા લોકો વિરુદ્ધ ગુન્હો નોંધ્યો છે. મળતી માહિતી અનુસાર પોલીસે આ કેસ સાથે સંકળાયેલા શખ્સોની ધરપકડ પણ કરી લીધી છે.