પ્રેમી યુગલોને અવારનવાર પ્રતાડિત કરવામાં આવતા રહે છે, પ્રેમ કરીને તેમણે જાણે કોઈ મોટો જઘન્ય અપરાધ કર્યો હોય તેમ જાહેરમાં ઢોર માર મારવો એ જાણે સામાન્ય બની ગયું છે. દાહોદ જિલ્લાના ફતેપુરા તાલુકામાં મહિલાને તાલીબાની સજા આપતો વીડિયો સામે આવ્યો છે. પરિણીત મહિલા પ્રેમી સાથે ભાગી જતા પતિ અને તેના પરિવારજનોએ ગ્રામજનોની હાજરીમાં નિર્મમતાપૂર્વક માર માર્યો હતો.  

મહિલાને જાહેરમાં તાલિબાની સજા

દાહોદ જિલ્લાના ફતેપુરા તાલુકામાં પરિણીત મહિલા પ્રેમી સાથે ભાગી જતા પતિ અને તેના પરિવારજનોએ ગામની વચ્ચે મહિલાને ઢસડી ગયા હતા. જ્યાં તેની સાડી ઉતારી નાખીને જાહેરમાં માર માર્યો હતો. સમગ્ર ઘટનાનો વીડિયો સામે આવતા પોલીસ એક્શનમાં આવી ગઈ છે.

સમગ્ર ઘટના શું છે?

દાહોદ જિલ્લાના ફતેપુરા તાલુકામાં આવેલા મારગાળામાં પરિણીત મહિલા તેના પ્રેમી સાથે ભાગી ગઈ હતી. જે બાદ મહિલા અને પ્રેમીને પકડી લાવીને તેના પતિ અને કુટુંબીજનોએ જાહેરમાં માર માર્યો હતો. તથા મહિલાના કપડા પણ ઉતારી નાખીને લોકોની સામે જ તેને જમીન પર ઢસડી હતી. આ ક્રૂર ઘટના બાદ પોલીસે કાર્યવાહી શરૂ કરતા 3થી 4 આરોપીઓની અટકાયત કરીને તેમની પૂછપરછ કરી છે.