ઈન્ટરનેટ બેંકિંગ જે ઝડપથી વધી રહ્યું છે તેટલા જ પ્રમાણમાં ઓન લાઈન ફ્રોડમાં પણ વધારો જોવા મળી રહ્યો છે. મહેસાણામાં એક બિલ્ડરના ખાતામાંથી એક સામટા 37 લાખ રૂપિયા ઉપડી ગયાની ઘટના કિસ્સો સામે આવ્યો છે. દુષ્યંત પટેલના ICICI બેંકના ખાતામાંથી  37 લાખ રૂપિયા ઉપડ્યોનો મેસેજ આવતા જ તેમને ધ્રાસ્કો લાગ્યો હતો.  દુષ્યંતભાઈ ICICI બેંકના એકાઉન્ટથી પોતાના ધંધાકીય વ્યવહાર કરતા આવ્યા છે અને વર્ષોથી આઈ સી આઈ સી આઈ બેંકના માધ્યમથી લેવડ દેવડ કરતા આવ્યા છે. 

કોઈ OTP,કૉલ કે મેસેજ વિના છેતરપિંડી 

આ કેસની રસપ્રદ બાબતો તે છે કે બિલ્ડર દુષ્યંત પટેલે કોઈ પણ OTP,ફોન કૉલ, મેસેજ  કે પછી કોઈ અજાણી લિંક  એક્સેસ કરી નહોતી, તેમ છતાં ગઠીયાએ કરામત કરીને તેમના ખાતામાંથી 37 લાખ રૂપિયા જેટલી મોટી રકમ ખેરવી લીધી હતી. દુષ્યંતભાઈ ICICI બેંકમાં ખાતાની વિગત જાણવા ગયા પણ ત્યા તેને કોઇ સંતોષજનક જવાબ ન મળતા આખરે તેમણે પોલીસ સ્ટેશનમાં ફરિયાદ નોંધાવી છે.

સાયબર ક્રાઈમ પોલીસ કરી રહી છે તપાસ

બિલ્ડર દુષ્યંત પટેલના સી સી એકાઉન્ટમાંથી એક જ દિવસમાં દસ મિનિટમાં 37 લાખ રૂપિયા અન્ય એકાઉન્ટમાં ટ્રાન્સફર થઈ જતા આખો મામલો સામે આવ્યો છે. આ મામલે બિલ્ડરે મહેસાણા સાયબર ક્રાઈમ પોલીસ સ્ટેશનમાં ફરિયાદ આપી છે અને બિલ્ડરની ફરિયાદ બાદ પોલીસે વિવિધ એકાઉન્ટમાં ટ્રાન્સફર થયેલી રકમ સ્ટોપ કરી દીધી છે. જો કે આટલી મોટી રકમ કેવી રીતે અન્ય ખાતામાં ટ્રાન્સફર થઈ તેનો જવાબ તો પોલીસ પાસે પણ નથી.