કોઈ પણ કંપનીમાં જેમ એક ફાઉન્ડરની સાથે એક કો-ફાઉન્ડર હોય છે તેમ અમેરિકા માટે એવું કહેવાતું હતું કે , પ્રેસિડન્ટ ડોનાલ્ડ ટ્રમ્પની સાથે એક કો પ્રેસિડન્ટ છે જે છે ટેસ્લાના સીઈઓ ઈલોન મસ્ક . પરંતુ જ્યારથી તેમણે ડોનાલ્ડ ટ્રમ્પની સરકારમાંથી રાજીનામુ આપી દીધું ત્યારથી જ બેઉ વચ્ચેના સંબંધોમાં જોરદાર તણાવ જોવા મળી રહ્યો છે. એક બાજુ પ્લેટફોર્મ એક્સ પર ડોનાલ્ડ ટ્રમ્પ અને ઈલોન મસ્ક વચ્ચેની અસેહમતીઓ બહાર આવી ગઈ. હવે ડોનાલ્ડ ટ્રમ્પ અને ઈલોન મસ્કના તણાવની અસર અમેરિકાની સિલિકોન વેલી પર પડવા જઈ રહી છે. 

અમેરિકામાં આવેલી સિલિકોન વેલી , કે જે ન માત્ર અમેરિકાનું પરંતુ સમગ્ર વિશ્વનું ટેક્નોલોજિકલ હબ છે. જ્યાં એપલ , ગુગલ અને ફેસબુક જેવી મોટી મોટી કંપનીઓના મુખ્યમથક આવેલા છે. પાછલા થોડાક સમયથી આપણે જોઈ રહ્યા છીએ કે , અમેરિકાના પ્રમુખ ડોનાલ્ડ ટ્રમ્પ અને અબજોપતિ ઈલોન મસ્ક વચ્ચે સંબંધોમાં જોરદાર તણાવ વર્તાઈ રહ્યો છે. આ તણાવને કારણે તેની માઠી અસર સિલિકોન વેલી પર પડી શકે છે. આમ તો સિલિકોન વેલીમાં જેટલી પણ કંપનીઓ આવેલી છે તેમના સીઈઓ વિશે એવું કહેવાય છે કે , આ લોકો રાજકારણથી દૂર રહે છે. પરંતુ ગયા વર્ષે અમેરિકામાં જે રાષ્ટ્રપતિના પદ માટે જે પણ ચૂંટણીઓ થઇ હતી તેમાં ઘણા ટેક્નોલોજી અબજોપતિઓએ ટ્રમ્પ પાછળ પૈસા રોક્યા છે. માટે હવે આ ટેક્નોલોજિકલ અબજોપતિઓ માટે એ વસ્તુ નક્કી કરવી કઠિન બનશે કે , ટ્રમ્પ કે પછી ઈલોન મસ્ક સાથે ઉભા રેહવું . એટલુંજ નહિ , ટ્રમ્પ અને મસ્ક વચ્ચેના મતભેદ કેટલીક ટેક કંપનીઓને પણ નુકશાન પહોંચાડી શકે છે. 

આ વસ્તુને એક ઉદાહરણની મદદથી સમજીએ , તો ડોનાલ્ડ ટ્રમ્પના વહીવટીતંત્ર સાથે ટેક ઉદ્યોગોના સંબંધોમાં મસ્કે મુખ્ય વ્યક્તિ તરીકેની ભૂમિકા ભજવી છે. દાખલા તરીકે , એક પ્રખ્યાત વેન્ચર કેપીટાલીસ્ટ ડેવિડ સેક્સ , જે ઈલોન મસ્કના નજીકના મિત્ર છે અને હાલમાં ટ્રમ્પ વહીવટીતંત્રમાં એઆઈ અને ક્રીપ્ટોકરન્સીનાં વડા છે. જો ડોનાલ્ડ ટ્રમ્પ પ્રત્યે ઈલોન મસ્કનું આક્રમકઃ વલણ ચાલુ રહેશે , તો ટ્રમ્પ મસ્કની કંપનીઓ અને સિલિકોન વેલી સાથે કેવું વર્તન કરશે તે જોવાનું રહેશે . હાલમાં સિલિકોન વેલીમાં એક મત એ પ્રવર્તી રહ્યો છે કે , ડોનાલ્ડ ટ્રમ્પનો સાથ આપવાથી ટેક ઇન્ડસ્ટ્રીને ખુબ ઓછો ફાયદો થયો છે જેમ કે , હજુ પણ મોટી ટેક્નોલોજિકલ કંપનીઓ પર કેસો ચાલી રહ્યા છે . જેમ કે , જસ્ટિસ વિભાગ એક વર્ષથી ગૂગલને તોડવાના પ્રયાસો કરી રહ્યું છે. ફેડરલ ટ્રેડ કમિશન ફેસબુકની પાછળ પડેલું છે. ટ્રમ્પની ટેરિફ પોલિસીથી , એપલને નુકશાન થવા જઈ રહ્યું છે.