ઘણા સમયથી એસટી બસના વીડિયો સામે આવી રહ્યા છે. એસટી વિભાગ ચર્ચામાં રહેતો હોય છે. થોડા સમય પહેલા એક વીડિયો સામે આવ્યો હતો જેમાં એસટી બસમાં પાછળ બેઠેલા લોકો નીચે પડી જાય છે. તે સિવાય એક સમાચાર ગોંડલ એસટી બસ સ્ટેન્ડમાં બસ સ્ટેન્ડ પર ઉભી રહેવાની જગ્યાએ બેરિકેડ્સ તોડી સીધી પૂછપરછની બારી આગળ ઘૂસી ગઈ. ત્યારે ફરી એક વખત એસટી બસ ડ્રાઈવરનો વીડિયો સામે આવ્યો છે જેમાં ડ્રાઈવર ચાલુ બસે ફોન પર વાત કરી રહ્યા છે. સોશિયલ મીડિયા પર આ વીડિયો વાયરલ થઈ રહ્યો છે.

ચાલુ બસે ફોન પર વાત કરી રહ્યા છે ડ્રાઈવર સાહેબ!        

એસ.ટી વિભાગનું સ્લોગન છે સલામત સવારી એસટી અમારી... પરંતુ અનેક વખત એસટી બસના એવા અનેક કિસ્સાઓ સામે આવતા હોય છે જે તેમના જ સ્લોગનને ખોટા સાબિત કરતા હોય છે. થોડા સમય પહેલા પણ એસટી બસનો કિસ્સો સામે આવ્યો હતો ત્યારે ફરી એક વખત એસટી બસ ચર્ચામાં આવી છે. અનુમાન પ્રમાણે આ વીડિયો લુણાવાડાથી અમદાવાદ જતી બસનું હોવાનું માનવામાં આવી રહ્યો છે. બસના ડ્રાઈવર ચાલુ બસે મોબાઈલ ફોન પર વાત કરી રહ્યા છે. સોશિયલ મીડિયા પર આ વીડિયો ખૂબ વાયરલ થઈ રહ્યો છે. ડ્રાઈવરની સાથે સાથે કંડક્ટર પણ ફોન પર વાત કરી રહ્યા છે. 

શું ડ્રાઈવર વિરૂદ્ધ કરવામાં આવશે કાર્યવાહી?  

ડ્રાઈવિંગ કરતી વખતે મોબાઈલ ફોન પર વાત કરવી ગુન્હો છે. અનેક લોકોએ આ વાતને લઈ દંડ પણ ભર્યો હશે. તે ઉપરાંત અકસ્માતોની સંખ્યામાં પણ વધારો જોવા મળી રહ્યો છે. ત્યારે આ બસ સ્પીડમાં જોવા મળી રહી છે. જો અકસ્માત સર્જાય અને કોઈ દુર્ઘટના સર્જાય તો તેના જવાબદાર કોણ? ચાલુ ગાડીએ ફોન પર વાત કરી ડ્રાઈવરે બસમાં મુસાફરી કરી રહેલા પેસેન્જરોના જીવને જોખમમાં મૂક્યા છે. ત્યારે જોવું એ રહ્યું કે ડ્રાઈવર વિરૂદ્ધ કોઈ કાર્યવાહી કરવામાં આવે છે કે નહીં?