વિરોધના અનેક વીડિયો તમે જોયા હશે. વિરોધ કરવા માટે બેનરો તેમજ સૂત્રોચ્ચારનો પ્રયોગ લોકો કરતા હોય છે. ત્યારે ગુજરાત સરકારે ગાંધીનગરની ગિફ્ટ સીટી માટે દારૂની છૂટ આપી દીધી છે. આને લઈ વિવાદ છેડાઈ ગયો છે. અલગ અલગ નેતાઓની પ્રતિક્રિયા સામે આવી છે પરંતુ સુરતથી જે દ્રશ્યો સામે આવ્યા છે તે અલગ છે. સુરતમાં કોંગ્રેસના કાર્યકર્તાઓ દ્વારા વિરોધ કરવામાં આવ્યો અને એ પણ દારૂની બોટલો સાથેનો વિરોધ! ત્યારે પ્રશ્ન થાય કે દારૂની બોટલ તેમની પાસે આવી ક્યાંથી?

દારૂની બોટલો સાથે લગાવ્યા નારા 

સુરતથી વિરોધના એવા દ્રશ્યો સામે આવ્યા છે જે સોશિયલ મીડિયા પર ખૂબ વાયરલ થઈ રહ્યા છે. એ વીડિયો જે પણ જુએ તે એવું જ કહે છે કે ભાઈ આ શું છે? ગિફ્ટ સિટીમાં દારૂની છૂટછાટના નિર્ણય સામે સુરતમાં સ્વાભિમાન સંગઠને વિરોધ પ્રદર્શન કર્યું. સંસ્થાના આગેવાન કિરીટ વાઘેલા સહિતના સભ્યોએ ભાગળ ચાર રસ્તા પર વિરોધ કર્યો હતો. દારૂની બોટલો સાથે રસ્તા વચ્ચે બેસીને નારાઓ લગાવાયા હતા. ઘટનાની જાણ થતા પોલીસે પ્રદર્શન કરનારાઓને અટકાવ્યા હતા.   

દારૂનો વિરોધ કરવા માટે દારૂ લઈને રસ્તા પર આવ્યા!

જબરજસ્ત કહેવાય નહિ કે દારૂનો વિરોધ કરવા માટે તમે જ રસ્તા પર બેસી દારૂની બોટલ લઈ આવો અને એવુ કહો કે દારૂની છૂટી તો હોવી જ ન જોઈએ. તો ભલા માણસ આ સુરતમાં તો દારૂબંધી છે જ. આખા ગુજરાતમાં દારૂબંધી છે તો આ લોકો પાસે દારૂ ક્યાંથી આવ્યો આપણે ભલે કેટલો પણ વિરોધ કરીએ. આપણે માનવું જ પડશે કે ગુજરાતમાં ભલે દારૂબંધી છે પણ સૌથી વધારે દારૂ ગુજરાતમાં વેચાય પણ છે લોકો પીવે પણ છે અને હવે તો રસ્તા વચ્ચે બેસી અને વિરોધ પણ કરે છે.