ડોનાલ્ડ ટ્રમ્પને રાષ્ટ્રપતિ બન્યાને માત્ર ૧૩૦ દિવસ થયા છે પરંતુ તેમના પોતાના જ દેશ અમેરિકામાં તેમની નીતિઓ ખુબ જ આકરા પડકારોમાંથી પસાર થઈ રહી છે . અત્યારસુધીમાં ડોનાલ્ડ ટ્રમ્પએ જ્યારથી ૨૦મી જાન્યુઆરીથી ઓવલ ઓફિસમાં કાર્યભાર સંભાળ્યો છે ત્યારથી તેમણે પોતાના ૧૧ મોટા નિર્ણયો પર યુ-ટર્ન લીધો છે . માટે ડોનાલ્ડ ટ્રમ્પ પર એક ઉક્તિ જોરદાર ફિટ બેસે છે તે છે : "યુ ટર્ન હે  , સબ યુ ટર્ન હે ." 

અમેરિકાના રાષ્ટ્રપ્રમુખ ડોનાલ્ડ ટ્રમ્પએ જ્યારથી પોતાનો કાર્યભાર સંભાળ્યો છે ત્યારથી ઓછામાં ઓછા ૧૮૦ એક્ઝિક્યુટિવ ઓર્ડર અને નીતિઓ પર અસ્થાયી / કાયમી સ્ટે મુક્યો છે. એટલુંજ નહિ ડોનાલ્ડ ટ્રમ્પએ પોતાના ૧૧ મોટા નિર્ણયો પર તો યુ-ટર્ન લીધો છે. ટ્રમ્પએ જે નીતિઓ વારંવાર પલ્ટી છે તેમાં સૌથી મોટો મુદ્દો ટેરિફ સબંધિત છે સાથે પ્રવાસી બાળકોના જન્મસિદ્ધ અધિકારને રોકવાનો નિર્ણય પણ થોડા દિવસોમાં રદ કરાયો હતો. સરકારી કાર્યક્ષમતા વિભાગ હેઠળ ઇબોલા નિવારણ ભંડોળ રદ કરાયું હતું પરંતુ પછીથી પુનઃસ્થાપિત કરવામાં આવ્યું હતું . મેક્સિકો - કેનેડા સાથેના વેપાર કરાર રદ કરવાની જાહેરાત કરી પરંતુ દબાણ બાદ આ નિર્ણય પણ મોકૂફ રાખવામાં આવ્યો હતો . ટ્રમ્પે મેક્સિકો અને કેનેડા પર 25% ટેરિફ લાદવાની જાહેરાત કરી હતી, પરંતુ તેમણે આ ટેરિફ રદ કર્યા હોવાનું જણાવાયું છે. આ ઉપરાંત, ચીન પર ટેરિફ મામલે પણ તેમણે  યુ ટર્ન લીધા છે. દુનિયાના વિવિધ દેશો પર એપ્રિલના પેહલા અઠવાડિયામાં ટ્રમ્પએ ટેરિફ વિસ્ફોટ કર્યા પછી તેમણે ૯૦ દિવસ માટે તેના અમલીકરણ પર પ્રતિબંધ મૂકી દીધો હતો . 

આટલુંજ નહિ ટ્રમ્પના વિવિધ આદેશોની વિરુદ્ધમાં અત્યારસુધીમાં ૨૫૦થી વધુ કેસ અમેરિકાની વિવિધ કોર્ટોમાં કેસ દાખલ કરાયા છે. નિષ્ણાતો કહે છે કે ટ્રમ્પની નીતિઓના ઉતાવળિયા અને વિચારહીન અમલીકરણને કારણે કોર્ટમાં પડકારો ઉભા થઈ રહ્યા છે. દાખલા તરીકે ટ્રમ્પએ વોઇસ ઓફ અમેરિકાને બંધ કરવાનો નિર્ણય લીધો હતો જેને કોલોરાડો કોર્ટે ગેરકાયદેસર જાહેર કર્યો હતો . કેલિફોર્નિયાની એક અદાલતે પર્યાવણીય નિયમોને નબળા પાડતા આદેશોને પણ રોક્યા હતા . વોશિંગ્ટન કોર્ટે બિન - અમેરિકનો માટે મતદાન પ્રતિબંધને ગેરબંધારણીય ઠેરવ્યો. ડોનાલ્ડ ટ્રમ્પના ટ્રાન્સજેન્ડર સમાજના સ્વાસ્થ્ય અધિકારોને મર્યાદિત કરવાના આદેશને ન્યુયોર્કની એક અદાલતે ભેદભાવપૂર્ણ અને ગેરકાયદેસર ગણાવ્યા હતા . વાત કરીએ આંતરરાષ્ટ્રીય સ્તરની , રશિયા અને યુક્રેન વચ્ચે જે યુદ્ધ ચાલી રહ્યું છે તેને પણ ડોનાલ્ડ ટ્રમ્પ અટકાવી નથી શક્યા . બેઉ દેશો વચ્ચે જોરદાર એસ્કેલેશન જોવા મળી રહ્યું છે.