કચ્છના ગાંધીધામનો ટીમ્બર ઉદ્યોગ એશિયાનો સૌથી મોટો ટીમ્બર ઉદ્યોગ છે. પરંતુ આ ઉદ્યોગના અત્યારે પડતીના દિવસો ચાલી રહ્યા છે. વાત એવી છે કે વન વિભાગના અધિકારીઓના કારણે ટીમ્બરના ઉદ્યોગને કરોડોનું નુકસાન થઈ રહ્યું છે. 

કેવી રીતે થયો ટીમ્બર ઉદ્યોગ ઠપ 

કચ્છમાં વિદેશથી આવતા ટીમ્બર માટેની જે વર્ષો જૂની પ્રથા હતી તે રાતોરાત બંધ કરી દેવામાં આવતા ઉદ્યોગપતિઓને ટ્રાન્ઝીટ પાસ માટે મુશ્કેલીનો સામનો કરવો પડી રહ્યો છે. ટ્રાન્ઝીટ સિસ્ટમ માટે ઘણી અરજીઓ આવી છે પરંતુ હાલ થોડી જ અરજીઓ પાસ થઈ છે જેના કારણે કરોડોનો વેપાર ઠપ પડી ગયો છે. 

અધિકારીઓ ભ્રષ્ટાચાર કરી રહ્યાનો ઉદ્યોગપતિઓનો આક્ષેપ

ટીમ્બર વેપારીઓના જણાવ્યા મુજબ પૂર્વ કચ્છના સ્થાનિક વન વિભાગની કચેરી ખુલ્લે આમ ભ્રષ્ટાચાર કરી રહી છે. તેમનો આક્ષેપ છે કે ટ્રાન્ઝીટ પાસ માટે સરકારી નિયમ મુજબ 20 રૂપિયા લેવામાં આવતા હતા પરંતુ વન વિભાગ 280 રૂપિયા ઉઘરાવે છે. ટીમ્બર મીલની નોંધણી માટે પણ હજારો રૂપિયા ગેરકાયદેસર રીતે લેવામાં આવે છે તેવો ટીમ્બરના ઉદ્યોગપતિઓ આક્ષેપ લગાવી રહ્યા છે. જોકે સમગ્ર મામલે વન વિભાગ તરફથી કોઈ પ્રતિક્રિયા નથી આપવામાં આવી.  

ભારત ડિજિટલ ઈન્ડિયાની વાતો કરી રહ્યું છે અને સિસ્ટમ અપડેટ કરી રહ્યું છે પરંતુ સ્થાનિક ક્ષેત્રોમાં તેની અમલવારી યોગ્ય રીતે નથી થઈ રહી જેના કારણે કરોડો રૂપિયાનું નુકસાન વેઠવાનો વારો આવી રહ્યો છે.