રાજ્યમાં દારૂબંધી કાયદાનો કેટલો અમલ થાય છે તે આપણે જાણીએ છીએ. દારૂબંધી કાયદાના ધજાગરા ઉડતા હોય તેવા કિસ્સાઓ પણ આપણી સામે વારંવાર આવી રહ્યા છે. આજે દારૂબંધીના કાયદાની નહીં પરંતુ બુટલેગરોની વાત કરવી છે. બુટલેગરો બેફામ બન્યા છે જેનું ઉદાહરણ ભાવનગરથી સામે આવ્યું છે. ભાવનગરમાં બુટલેગરે ભાજપની મહિલા કોર્પોરેટરને જાનથી મારી નાખવાની ધમકી આપી છે. એક વીડિયો વાયરલ થયો છે જેમાં કોર્પોરેટરના ઘર પર આવીને બુટલેગરો કોર્પોરેટરને તેમજ તેમના પતિને ધમકાવી રહ્યા છે.     

ભાવનગરમાં બુટલેગર બેફામ બન્યા!

બુટલેગરોની હિંમત દિવસેને દિવસે વધી રહી છે. દારૂબંધી કાયદાને લઈ તેમને કેટલો ડર છે એ તો જાણીએ જ છીએ પરંતુ હવે તો ઘરમાં આવીને બુટલેગરો ભાજપના મહિલા કોર્પોરેટરને ધમકી આપી રહ્યા છે. આનું તાજુ ઉદાહરણ છે ભાવનગર. શહેરના કુંભારવાડા વિસ્તારમાં આવેલી મીલની ચાલીની નજીક રહેતા અને વડવા બ વોર્ડ નંબર 3ના ભાજપના કોર્પોરેટર સેજલબેન મહેશભાઈ ગોહિલને જાનથી મારી નાખવાની ધમકી આપવામાં આવી અને એ પણ તેમના ઘરે. 

મહિલા કોર્પોરેટરને મળી જાનથી મારી નાખવાની ધમકી 

જાનથી મારી નાખવાની ધમકી મળતા આ અંગેની પોલીસ ફરિયાદ દાખલ કરવામાં આવી. ગૃહમંત્રીને આ અંગે પત્ર પણ લખવામાં આવ્યો છે જેમાં એવો ઉલ્લેખ કરવામાં આવ્યો છે કે બુટલેગરો ઘર પર પથ્થરમારો કરે છે. સેજલબેનનો એક વીડિયો પણ સામે આવ્યો છે. વીડિયોમાં તેમણે તેમને મળતી ધમકીનો ઉલ્લેખ પણ કર્યો હતો. મહિલા કોર્પોરેટરને ધમકી મળી રહી હતી કે તમે ભાજપનું આટલું કામ ન કરો બાકી અમે તમને હેરાન કરીશું.  

ભાજપની મહિલા કોર્પોરેટર જ સુરક્ષિત નથી!

પોલીસ ફરિયાદ થયા બાદ પોલીસે આ અંગે તપાસ શરૂ કરી છે. આવી ઘટનાઓ સામે આવતા એક પ્રશ્ન થાય કે જો બુટલેગરો ભાજપના મહિલા કોર્પોરેટરને જાનથી મારી નાખવાની ધમકી આપી શકતા હોય તો સામાન્ય માણસ સાથે કેવું વર્તન કરતા હશે? મહિલાઓની સુરક્ષા પર પણ અનેક ગંભીર સવાલો ઉભા થાય છે.