ભારતે શ્રીલંકા (IND vs SL)ને 317 રનથી હરાવીને વન ડે સીરીઝને ક્લિન સ્વિપ કરી લીધી છે. વનડેમાં રનોના બાબતમાં આ સૌથી મોટી જીત છે. આ પહેલા ન્યુઝીલેન્ડએ આયરર્લેન્ડને 290 રનથી હરાવ્યું હતું. ભારતને આ પહેલા બર્મુડા સામે 2007માં 257 રનોથી જીત મળી હતી. કેરળના તિરૂઅનંતપુરમના ગ્રીનફીલ્ડ ઈન્ટરનેશનલ સ્ટેડિયમમાં રમાયેલા મુકાબલામાં ભારત માટે વિરાટ કોહલી અને શુભમન ગીલે જબરદસ્ત બેટિંગ કરી શ્રીલંકાના બોલરોને ધોઈ નાખ્યા હતા.  

કોહલી-ગીલે આપી મજબુત શરૂઆત 

ટીમ ઈન્ડિયાએ પ્રથમ બેટિંગ કરતા વિરાટ કોહલીના અણનમ 166 અને શુભમન ગિલના 116 રનની મદદથી 50 ઓવરમાં 5 વિકેટે 390 રન બનાવ્યા હતા. જવાબમાં શ્રીલંકાની ટીમ માત્ર 73 રનમાં ઓલઆઉટ થઈ ગઈ હતી. જોકે, શ્રીલંકાની માત્ર 9 વિકેટ પડી હતી, કારણ કે તેમનો એક ખેલાડી ઈજાગ્રસ્ત હતો, તેથી ટીમને ઓલઆઉટ ગણવામાં આવી હતી. વનડે ક્રિકેટમાં રનની દ્રષ્ટિએ આ સૌથી મોટી જીત છે. 

મોહમ્મદ સિરાઝ સૌથી સફળ બોલર

શ્રીલંકાને ભારતના ઝડપી બોલર મોહમ્મદ સિરાઝે શરૂઆતમાં જ મોટા ઝટકા આપ્યા હતા. સિરાઝે બીજા જ ઓવરમાં અવિષ્કા ફર્નાન્ડોને પવેલિયન મોકલ્યા બાદ કુશલ મેન્ડિસ, વાનિંદુ હસરંગા, અને નુવાનિંદુ ફર્નાન્ડોને પણ સિરાઝે પહેલા પાવર પ્લેમાં જ આઉટ કરી દીધો હતો, શમીએ અસલંકાની વિકેટ લીધી હતી. 10 ઓવર બાદ શ્રીલંકાની 39 રન પર 5 વિકેટ હતી. સિરાઝે 34 રન આપીને 4 વિકેટ લીધી આ વન ડેમાં તેમનું સર્વશ્રેષ્ઠ પ્રદર્શન છે.