અમેરિકામાં આ વર્ષના અંતમાં યોજાનારી રાષ્ટ્રપતિની ચૂંટણીને લઈ એક ચોંકાવનારા સમાચાર આવી શકે છે. અમેરિકન મીડિયા રિપોર્ટ્સ અનુસાર, રાષ્ટ્રપતિ જો બિડેન છેલ્લી ક્ષણે તેમની ઉમેદવારી છોડી શકે છે અને તેમના સ્થાને પૂર્વ રાષ્ટ્રપતિ બરાક ઓબામાની પત્ની મિશેલ ઓબામાને ડેમોક્રેટિક પાર્ટી તરફથી ઉમેદવાર બનાવવામાં આવી શકે છે. હકીકતમાં, હાલમાં જ સ્પેશિયલ કાઉન્સેલ રોબર્ટ હુરનો એક રિપોર્ટ સામે આવ્યો હતો. તેમાં સ્પષ્ટપણે કહેવામાં આવ્યું છે કે બિડેન શારીરિક નબળાઈઓ સામે ઝઝૂમી રહ્યા છે,  તેથી તેમના માટે ચૂંટણી લડવી યોગ્ય નથી. જો કે, બિડેને આ રિપોર્ટને નકારી કાઢ્યો હતો અને કહ્યું હતું કે ઉંમર સાથે કેટલીક સમસ્યાઓ ઊભી થાય છે, પરંતુ તેનો અર્થ એ નથી કે હું ફિટ નથી.

વિવેક રામાસ્વામીએ મિશેલના નામ અંગે માહિતી જાહેર કરી 

9 ફેબ્રુઆરીએ વિવેક રામાસ્વામીએ ડેમોક્રેટ ઉમેદવાર વિશે ચોંકાવનારો ઘટસ્ફોટ કર્યો હતો. વિવેકે કહ્યું, ડેમોક્રેટિક પાર્ટી મિશેલ ઓબામાને બિડેનની જગ્યાએ નોમિનેટ કરવા પર વિચાર કરી રહી છે. મીડિયા રિપોર્ટ્સ કહે છે કે ડેમોક્રેટિક પાર્ટી બરાક ઓબામાની લોકપ્રિયતાનો લાભ લેવા માટે મિશેલને રાષ્ટ્રપતિ પદના ઉમેદવાર બનાવી શકે છે. સ્પેશિયલ કાઉન્સેલ રોબર્ટ હુરના રિપોર્ટ સામે આવ્યા બાદ આ નિર્ણય લેવામાં આવ્યો છે. બિડેનના સ્વાસ્થ્યને લઈને રિપોર્ટમાં કેટલા ગંભીર સવાલો ઉભા થયા છે તે બધાએ જોયું છે. ઉલ્લેખનિય છે તે વિવેક રામાસ્વામી પણ રિપબ્લિકન પાર્ટી તરફથી રાષ્ટ્રપતિ પદના ઉમેદવાર બનવાની રેસમાં હતા. બાદમાં તેમણે ડોનાલ્ડ ટ્રમ્પના સમર્થનમાં પોતાનું નામ પાછું ખેંચી લીધું હતું.

હિલેરી ક્લિન્ટને પણ બિડેનના સ્વાસ્થ્ય અંગે સવાલો ઉઠાવ્યા 

 પૂર્વ વિદેશ મંત્રી હિલેરી ક્લિન્ટને પણ બિડેનના સ્વાસ્થ્ય અંગે સવાલો ઉઠાવ્યા છે. હિલેરી ક્લિન્ટને એક ઈન્ટરવ્યુમાં સ્વીકાર્યું હતું કે જો ડેમોક્રેટ્સ બિડેનને ઉમેદવાર બનાવે છે તો તેનો સીધો ફાયદો ટ્રમ્પને થશે. તેથી, બિડેનનો વિકલ્પ શોધવો મહત્વપૂર્ણ છે. દરમિયાન યુએનના પૂર્વ રાજદૂત નિક્કી હેલી, જે ડોનાલ્ડ ટ્રમ્પ સામે પક્ષના નામાંકન માટેની રેસમાં એકમાત્ર રિપબ્લિકન ઉમેદવાર બાકી રહ્યા છે, તેમણે કહ્યું છે કે અમેરિકામાં "2024 માં એક મહિલા પ્રમુખ" હશે અને તે કાં તો તે પોતે અથવા કમલા હેરિસ હશે. બંને ભારતીય મૂળના છે.