ચીનમાં ફેલાયેલા કોરોના સંક્રમણ માટે જવાબદાર ઓમિક્રોનના વેરિયેન્ટ  BF.7થી સમગ્ર વિશ્વમાં ભયનો માહોલ છે. અત્યંત સંક્રામક આ વેરિયેન્ટ એક સાથે 18 લોકોને સંક્રમિત કરી શકે છે. વળી તેના લક્ષણો પણ જલદીથી સમજી શકાય તેમ નથી

વેરિયેન્ટના લક્ષણો પકડાતા નથી

મીડિયા રિપોર્ટ મુજબ Omicron BF.7 વેરિઅન્ટનું R મૂલ્ય 10 થી 18.6 છે. આનો અર્થ એ છે કે આ નવા પ્રકારથી સંક્રમિત એક વ્યક્તિ લગભગ 18-19 લોકોને ચેપ લગાવી શકે છે. દુનિયાના ઘણા દેશો પછી ભારતમાં પણ તેના કેસ જોવા મળ્યા છે. ઠંડીમાં Omicron BF.7 ના લક્ષણો ઝડપથી પકડાતા નથી, કારણ કે શરદી અને કોરોના સંક્રમણના લક્ષણો મોટે ભાગે સમાન હોય છે. તેથી, આ લક્ષણોને બિલકુલ અવગણશો નહીં અને તરત જ ડૉક્ટર પાસે જાઓ અને ટેસ્ટ કરાવો.

ઓમિક્રોનના 130 સબ-વેરિઅન્ટ 

ચીનની નેશનલ ઈન્સ્ટિટ્યૂટ ફોર વાઈરલ ડિસીઝ કંટ્રોલ એન્ડ પ્રિવેન્શનના વડા ઝુ વેન્બોના જણાવ્યા અનુસાર, છેલ્લા ત્રણ મહિનામાં ઓમિક્રોનના 130 સબ-વેરિઅન્ટ ચીનમાં જોવા મળ્યા છે. જેમાંથી 50 પેટા પ્રકારો ચેપના ક્લસ્ટરની રચના માટે જવાબદાર છે. ચીનના પ્રતિષ્ઠિત મીડિયા ચાઈના ડેઈલી દ્વારા આ માહિતી આપવામાં આવી છે.

બૂસ્ટર ડોઝ રક્ષણાત્મક કવચ છે

AIIMSના ભૂતપૂર્વ ડિરેક્ટર ડૉ. રણદીપ ગુલેરિયાએ કોવિડ બૂસ્ટર ડોઝને રક્ષણાત્મક કવચ તરીકે ગણાવ્યું છે. તેમનું માનવું છે કે તેનો બુસ્ટર ડોઝ લઈને Omicron BF.7 વેરિઅન્ટને રોકી શકાય છે. કારણ કે, ચીનમાં ઝીરો કોવિડ પોલિસીના કારણે લોકો રોગપ્રતિકારક શક્તિ વિકસાવી શક્યા નથી અને હવે તેઓ વિકટ પરિસ્થિતિનો સામનો કરી રહ્યા છે.