શુક્રવારે ભારતીય રૂપિયામાં જોરદાર ઉછાળો જોવા મળ્યો છે. રૂપિયાએ પાછલા સત્રોમાં થયેલા નુકસાનને વસૂલ્યું છે. એવું માનવામાં આવે છે કે યુએસમાં મોંઘવારીને લઇ આંકડાઓ નીચા હોવાને કારણે ડોલરમાં ઘટાડો થયો છે અને તેનાથી રૂપિયો મજબૂત થયો છે. શુક્રવારે સવારના સત્રમાં ભારતીય રૂપિયો 80.75 રૂપિયા પ્રતિ ડૉલર પર ટ્રેડ થતો જોવા મળ્યો હતો.

2013 પછી રૂપિયો સૌથી મજબૂતી સાથે ખુલ્યો છે

સપ્તાહના છેલ્લા ટ્રેડિંગ દિવસે રૂપિયો 80.6888ના સ્તરે ખૂલ્યો હતો, જ્યારે પાછલા સત્રમાં તે 81.8112 પોઈન્ટ પર બંધ થયો હતો. શુક્રવારે ડોલર સામે રૂપિયો 10 પૈસાની મજબૂતી સાથે ખુલ્યો હતો. રૂપિયામાં છેલ્લા નવ વર્ષમાં આ સૌથી મોટી ઓપનિંગ છે. સપ્ટેમ્બર 2013 થી, શુક્રવાર (11 નવેમ્બર)ના રોજ રૂપિયો સૌથી વધુ ઉછાળા સાથે ખુલ્યો છે અને સાત સપ્તાહની ટોચે ટ્રેડ થઈ રહ્યો છે.

ડૉલર ઇન્ડેક્સ સામે રૂપિયાનું નજીકનું સપોર્ટ લેવલ રૂપિયા 80.50 છે.

શરૂઆતના સત્રમાં, રૂપિયો રૂ. 80.6788 થી રૂ. 80.7525ની રેન્જમાં ટ્રેડ થયો હતો અને સતત રૂ. 81 પ્રતિ ડોલરની નીચે રહ્યો હતો. બજારના જાણકારોના મતે યુએસ ડૉલર 81.91 સુધી વધ્યા બાદ રૂપિયો વધવાનો રસ્તો સાફ કરી દીધો છે. ડૉલર ઇન્ડેક્સ સામે રૂપિયાનું નજીકનું સપોર્ટ લેવલ 80.50 છે જ્યારે મનોવૈજ્ઞાનિક સ્તર 80 છે. એવું માનવામાં આવે છે કે શુક્રવારે, રૂપિયો આખો દિવસ 80.25 થી 81 ના સ્તરની વચ્ચે વેપાર ચાલુ રાખશે.

અમેરિકામાં મોંઘવારીમાં ઘટાડાને કારણે વૈશ્વિક બજારમાં મજબૂતી જોવા મળી હતી

અમેરિકામાં ઓક્ટોબર મહિનાના મોંઘવારીના આંકડા બજારના અંદાજ કરતા ઓછા રહ્યા છે, જેના કારણે વૈશ્વિક શેરબજારમાં સારી મજબૂતી જોવા મળી રહી છે. ડૉલર ઇન્ડેક્સ પર ભારે દબાણ છે અને તે 108ના સ્તરની નીચે આવી ગયો છે. આનું પરિણામ એ આવ્યું છે કે આજે રૂપિયો ડોલર સામે 110 પૈસાના ઉછાળા સાથે ખુલ્યો છે.