સોશિયલ મીડિયા પર સ્ટંટ કરતા લોકોના વીડિયો ઘણી વખત વાયરલ થઈ જતા હોય છે. ત્યારે એક વીડિયો ગુરૂગ્રામથી સામે આવ્યો છે જેમાં ચાર લોકો ચાલતી ગાડીમાં છાપરા પર બેસી દારૂ પી રહ્યા છે. આ વીડિયો સોશિયલ મીડિયા પર ખૂબ વાયરલ થઈ રહ્યો છે. દારૂ પીને એક યુવક પુશ અપ કરી રહ્યો છે. આ વીડિયો સામે આવતા પોલીસે કાર્યવાહી કરી છે.  યુવકો વિરુદ્ધ કેસ દાખલ કરવામાં આવ્યો છે. મળતી માહિતી અનુસાર એક વ્યક્તિને પોલીસે હિરાસતમાં લઈ લીધો છે જ્યારે અન્ય ત્રણ લોકોની શોધખોળ પોલીસ કરી રહી છે. પોલીસે 6 હજારથી વધારેનો દંડ ફટકાર્યો છે. 

છત પર બેસી વ્યક્તિ પુશ-અપ્સ કરતો નજરે પડ્યો!

જે વીડિયો વાયરલ થઈ રહ્યો છે તે વીડિયો ગુરૂગ્રામના સાઈબર હબ વિસ્તારનો છે. પોલીસના જણાવ્યા અનુસાર સોશિયલ મીડિયા પર બે વીડિયો વાયરલ થઈ રહ્યા છે. પહેલા વીડિયોમાં એક વ્યક્તિ ચાલતી ગાડીમાંથી બહાર નીકળે છે અને ગાડીના છાપરા પર જઈ બેસી જાય છે. તેના હાથમાં દારૂની બોટલ જોવા મળે છે. બીજો જે વીડિયો વાયરલ થઈ રહ્યો છે તેમાં તેની સાથે ત્રણ બીજા લોકો દેખાઈ રહ્યા છે. આ દરમિયાન તે ચાલુ ગાડીમાં પુશઅપ કરી રહ્યો છે. બાકીના લોકો ચાલતી ગાડીની બારીમાંથી બહાર જોઈ અવાજ કરી તેમજ નાચતા જોવા મળે છે.   

પોલીસે સ્ટંટ કરતા લોકો વિરૂદ્ધ કરી કાર્યવાહી!

મહત્વનું છે કે આ વીડિયો સામે આવતા કડક કાર્યવાહી કરવામાં આવી છે. ગાડીની નંબર પ્લેટ આધારે દંડ ફટકારવામાં આવ્યો છે. મળતી માહિતી અનુસાર ગુરૂગ્રામ પોલીસે ગાડીને કબજે કરી લીધી છે. એક વ્યક્તિની પોલીસે અટકાયત પણ કરી લીધી છે. વાહન ચલાવતી વખત કરવામાં આવતા સ્ટંટના વીડિયો અનેક વખત સામે આવતા રહે છે. સ્ટંટ કરતા વ્યક્તિઓને કારણે અનેક વખત અકસ્માત સર્જાય છે અને અનેક લોકોના જીવ જતા હોય છે. લોકોના જીવ જોખમમાં મૂકાય છે.