અમેરિકાના પ્રમુખ જો બિડેન યુધ્ધગ્રસ્ત દેશ યુક્રેનની મુલાકાતે પહોંચ્યા છે. રશિયા અને યુક્રેન વચ્ચે 24 ફેબ્રુઆરી 2022ના દિવસે યુધ્ધ શરૂ થયા બાદ બિડેનનો આ સૌપ્રથમ યુક્રેન પ્રવાસ છે. અમેરિકાના પ્રમુખ બિડેન કીવ પહોંચ્યા તેને લઈ રશિયા ભયાનક ગુસ્સે થયું છે. 

યુક્રેનને મિત્ર અમેરિકાનું સમર્થન

અમેરિકાના પ્રમુખ જો બિડેનની આ સરપ્રાઈઝ યુક્રેન મુલાકાતનો હેતુ યુક્રેન સમર્થન આપવાનો છે. એક વર્ષથી ચાલી રહેલા આ યુધ્ધના કારણે યુક્રેન આર્થિક રીતે પાયમાલ થઈ ગયું છે. બિડેન રાજધાની કીવ પહોંચ્યા ત્યારે સાયરનના અવાજથી માહોલ ગુંજી ઉઠ્યો હતો. આ સાયરન સોમવારે સવારથી જ સક્રિય થઈ ગયા હતા. કિવમાં સત્તાવાળાઓએ લોકોને શેલ્ટર્સમાં જવા કહ્યું છે. યુક્રેન અને અમેરિકા બંનેને ડર છે કે રશિયા ફરી એકવાર યુદ્ધમાં મજબૂત થઈ રહ્યું છે. બિડેન પોલેન્ડ જવાના હતા પરંતુ યુક્રેન પહોંચીને વિદેશી બાબતોના નિષ્ણાતોને ચોંકાવી દીધા છે.

યુક્રેન પ્રવાસ ગુપ્ત રખાયો

બિડેનના આ યુક્રેન પ્રવાસને સંપૂર્ણપણે ગુપ્ત રાખવામાં આવ્યો હતો. બિડેન પોલેન્ડની બોર્ડરથી ટ્રેન દ્વારા યુક્રેન પહોંચ્યા હતી. સુરક્ષા અધિકારીઓ તેમની મુલાકાતથી ખૂબ જ ચિંતિત હતા. પેન્ટાગોનના અધિકારીઓ અને સિક્રેટ સર્વિસ એજન્ટો ઈચ્છતા ન હતા કે બિડેન યુક્રેન જાય. બિડેન યુક્રેન જઈ રહ્યા છે તેનો કોઈને અણસાર પણ  આવ્યો નહોતો. 

યુક્રેનને 50 કરોડ ડોલરની મદદ

બિડેને યુક્રેનની રાજધાની કીવમાં તેમના યુક્રેનિયન સમકક્ષ વોલોડિમિર ઝેલેન્સકી અને તેમની પત્ની ઓલેના સાથે રાષ્ટ્રપતિ નિવાસસ્થાનમાં મુલાકાત કરી હતી. બિડેને કહ્યું કે અમેરિકા યુક્રેનને 50 કરોડ ડોલરના નવા હથિયારો આપવા જઈ રહ્યું છે. આમાં જેવલિન મિસાઇલ, હોવિત્ઝર અને શેલનો સમાવેશ થાય છે.