પાકિસ્તાનના પૂર્વ પ્રધાનમંત્રી ઈમરાન ખાનની ધરપકડ ગઈકાલે થઈ ગઈ હતી. ઈમરાન ખાનની ધરપકદ બાદ પાકિસ્તાનમાં હિંસા ભડકી ઉઠી હતી. ધરપકડના આટલા કલાકો વિત્યા બાદ પણ પાકિસ્તાનમાં હિંસા શાંત થવાનું નામ નથી લઈ રહી. પેશાવર, ઈસ્લામાબાદ સહિત અનેક શહેરોમાં હિંસા વધારે ફાટી નિકળી છે. પીટીઆઈના સમર્થકો દ્વારા તોડફોડ કરવામાં આવી રહી છે. ઉપરાંત આગ પણ લગાવવામાં આવી રહી છે. મળતી માહિતી અનુસાર આ હિંસાને કારણે 6 જેટલા લોકોના મોત થઈ ગયા છે. હિંસા વધતા ધારા 144 લાગુ કરવામાં આવી છે. ઉપરાંત ઈન્ટરનેટ સેવા પણ બંધ કરવામાં આવી છે.

ઈમરાન ખાનની ધરપકડ બાદ પાકિસ્તાનમાં ફાટી નિકળી હિંસા!  

મંગળવારે પાકિસ્તાનના પૂર્વ વડાપ્રધાન ઈમરાન ખાનની ધરપકડ પાક રેન્જર્સ દ્વારા કરવામાં આવી હતી. ઈસ્લામાબાદ હાઈકોર્ટની બહાર જ ઈમરાન ખાનની ધરપકડ કરાઈ હતી. ઈમરાન ખાનની ધરપકડ થયા બાદ પાકિસ્તાનના અનેક વિસ્તારોમાં હિંસા ફાટી નિકળી હતી. પીટીઆઈના કાર્યકર્તાઓ દ્વારા ગઈકાલે મોડી રાત્રે રાવલપિંડીમાં આર્મી હેડક્વાર્ટરમાં તોડફોડ કરવામાં આવી હતી. તે ઉપરાંત લાહોરના ગવર્નર હાઉસમાં પણ તોડફોડ કરી હતી. ત્યારે આ મામલો આટલા કલાકો વિત્યા પછી પણ હિંસા શાંત થઈ નથી. પાકિસ્તાનના મીડિયા રિપોર્ટ અનુસાર ઈમરાન ખાન આગામી ચાર પાંચ દિવસ એનએબીના કસ્ટડીમાં રહેશે. 

વધતી હિંસાને જોતા ઈન્ટરનેટ સેવા કરાઈ બંધ!

ઈમરાન ખાન મની લોન્ડરિંગ સહિતના કેસને લઈ જામીન માટે હાઈકોર્ટ પહોંચ્યા હતા તે સમયે તેમની ધરપકડ કરવામાં કરવામાં આવી હતી. અનેક આર્મી ઓફિશિયલના ઘરો પર હુમલો કરવામાં આવ્યો હતો. તે સિવાય લાહોરમાં પણ હિંસા ફાટી નિકળી હતી. ત્યારે વધતી હિંસાને જોતા કલમ 144 લાગુ કરવામાં આવી છે. તે ઉપરાંત ઈન્ટરનેટ સેવા પણ બંધ કરવામાં આવી છે. મળતી માહિતી અનુસાર પેશાવરમાં 30 દિવસો સુધી ધારા 144 લાગુ કરવામાં આવી છે. આ ઘટનાને લઈ ઈસ્લામાબાદ પોલીસે જણાવ્યું કે 5 ઓફિસરો ઘાયલ થયા છે. ઉપરાંત 43 જેટલા પ્રદર્શનકારીઓ વિરૂદ્ધ કાર્યવાહી કરવામાં આવી છે.