વાહન ચલાવતી વખતે અનેક નિયમોનું પાલન કરવું જરૂરી છે. જો તમે નિયમોનું પાલન નથી કરતા તો વાહન ચાલક વિરૂદ્ધ કાર્યવાહી થઈ શકે છે. જે કાયદા છે તેનું પાલન દરેક વાહનચાલકોએ કરવાનું હોય છે, એ પછી  સામાન્ય નાગરિક હોય કે પછી પોલીસ હોય. નિયમ દરેક માટે સરખો હોય છે. એડવોકેટ મેહુલ બોઘરા હમેશા લોકોને ટ્રાફિકના નિયમો અને કાયદાનું ભાન કરાવતા હોય છે ત્યારે ફરી એક વીડિયો વાયરલ થયો જેમાં મેહુલ બોઘરા એક પોલીસ કર્મચારીને કાયદાનો બોધ કરાવી રહ્યા છે. અનેક વખત તેમના વીડિયો સામે આવતા રહે છે.  

ગાડીમાં લગાવાઈ હતી બ્લેક ફિલ્મ  

આપણી સામે એવા અનેક કિસ્સાઓ હોય છે જેમાં લોકો કાયદાનો ભંગ કરતા દેખાતા હોય છે. વાહનચાલકો કાયદાનું ઉલ્લંઘન ખુલ્લેઆમ કરતા હોય છે. નિયમો તોડનાર લોકોમાં અનેક પોલીસકર્મીઓનો પણ સમાવેશ થાય છે. નિયમો દરેક માટે સરખા હોય,એ પછી પોલીસ કર્મી હોય કે પછી સામાન્ય નાગરિક. મેહુલ બોઘરાનો એક વીડિયો સામે આવ્યો છે જેમાં તે પોલીસકર્મીને કાયદાનું ભાન કરાવી રહ્યા છે. પોલીસકર્મીની કારમાં બ્લેક ફિલ્મ લગાવામાં આવી હતી. 

પોલીસની પાસે ન હતા ડોક્યુમેન્ટ 

વિગતવાર વાત કરીએ તો 17 ઓગસ્ટના રોજ મેહુલ બોઘરા ડીંડોલી રસ્તા પરથી પસાર થઈ રહ્યા હતા તે દરમિયાન એક વ્યક્તિ કાળા કાચવાળી ગાડી ચલાવતો હતો. જેને લઈ મેહુલ બોઘરા ગાડીમાંથી ઉતર્યા અને તેની પૂછપરછ કરી, વાતચીત દરમિયાન ખ્યાલ આવ્યો કે ગાડી ચલાવનાર પાંડેસરા પોલીસ સ્ટેશનમાં કોન્સ્ટેબલ છે. પછી પોલીસને બોલાવીને મેમો પાઠવવા કહ્યું. ગાડી આગળ પોલીસ લખેલું હતું, ઉપરાંત ગાડીની puc, rcbook કાંઈ જ હતું નહીં. અડધો કલાક સુધી આ રકજક ચાલી અને છેલ્લે  ડીંડોલી સર્કલ પીઆઇ ઘટના સ્થળે પહોંચ્યા અને પોલીસ કર્મીને કાયદાનો ભંગ કરવા બદલ 3000 રૂપિયાનો દંડ ફટકાર્યો હતો. જેની પાસેથી દંડ વસૂલવામાં આવ્યો છે તેમનું નામ છે  વિનોદભાઈ.  

કાયદાથી મોટું કોઈ નથી!

આ ઘટનાઓ એ સાબિત કરે છે કે કાયદો બધા માટે સમાન છે સામાન્ય નાગરિક હોય કોઈ અધિકારી હોય કે નેતા બધાએ કાયદાનું પાલન કરવું જ પડશે.પોલીસ દ્વારા કરવામાં આવેલી કામગીરીને લોકો બિરદાવી રહ્યા છે.