.jpg "The News Reporter")
અમદાવાદમાં ચોમાસા દરમિયાન માર્ગો પર મસમોટા ભુવા પડવા તે કોઈ મોટી વાત નથી. આજે શહેરના સરખેજ વિસ્તારમાં આવેલા અંબર ટાવરની સામે 100 ફૂટ રોડ પર એક મસમોટો ભૂવો પડ્યો છે. જો કે રસપ્રદ બાબત એ છે કે આ ભૂવામાં અમદાવાદ મ્યુનિસિપરલ કોર્પોરેશનનું ટ્રક જ ગરકાવ થઈ ગયું છે.
વીડિયો સોશિયલ મીડિયામાં વાયરલ
અમદાવાદ મ્યુનિસિપરલ કોર્પોરેશનનું ડમ્પર આ ભૂવામાં ફસાતા લોકોમાં કૂતુહલ સર્જાયું છે. મોટી સંખ્યામાં લોકો ફોટો અને વીડિયો ઉતારવા ઉમટી રહ્યા છે. આ ઘટનાના વીડિયો સોશિયલ મીડિયામાં ખુબ વાયરલ થઈ રહ્યા છે. ડમ્પરનો પાછળનો ભાગ ભૂવામાં ગરકાવ થઈ જતા આગળનો ભાગ ઉપર થઈ ગયો છે. આ અંગેની જાણ કોર્પોરેશનને કરતા ભૂવામાં ફસાયેલી ગાડીને બહાર કાઢવાની કામગીરી શરૂ કરવામાં આવી હતી.
સ્થાનિક લોકોના જણાવ્યા પ્રમાણે બુધવાર સવારે મ્યુનિસિપલ કોર્પોરેશનનું વાહન 100 ફૂટ રોડ પર સવેરા હોટલ પાસે પડતાં ત્રણ રસ્તા પાસે ભુવામાં ગરકાવ થયું હતું. બાદમાં સ્થાનિક લોકોની મદદથી ડ્રાઇવર અને ગાડીમાં સાથે રહેલા લોકોને વાહનમાંથી બહાર કાઢવામાં આવ્યા હતા. જે બાદ આ સમગ્ર ઘટના અંગે તંત્રને જાણ કરવામાં આવી હતી, જેથી ભૂવામાંથી વાહન બહાર કાઢી શકાય.
