રાજ્યમાં ફરી એક વખત માવઠાની સ્થિતી સર્જાય તેવી શક્યતા જોવા મળી રહી છે. જાણીતા હવામાન નિષ્ણાંત અંબાલાલ પટેલે આગામી દિવસોમાં હવામાન કેવું રહેશે તે અંગે આગાહી કરી છે. રાજ્યમાં એક તરફ ફુલગુલાબી ઠંડીનો માહોલ જોવા મળી રહ્યા છે ત્યારે અંબાલાલ પટેલના જણાવ્યા મુજબ ઉત્તરપ્રદેશ, મધ્યપ્રદેશ અને ગુજરાતમાં ઠંડા પવનના કારણે ઠંડી વધશે. તેમના જણાવ્યા પ્રમાણે આગામી 29 ડિસેમ્બરે અરબ સાગરમાં એક સિસ્ટમ બનશે, હવાનું હળવું દબાણ ઊભું થઈ શકે છે જેના પરિણામે આ વર્ષના અંત સુધીમાં મહારાષ્ટ્રના કેટલાંક ભાગો તેમજ મુંબઈ અને ગોવાના કેટલાંક વિસ્તારોમાં વરસાદ થવાની શક્યતા છે. આ સિસ્ટમના કારણે બંગાળના ઉપસાગરને કારણે પૂર્વીય વિસ્તાર અને છત્તીસગઢમાં હવામાં પલટો આવી શકે છે.

રાજ્યના આ વિસ્તારોમાં માવઠાની આગાહી

હવામાન નિષ્ણાંત અંબાલાલ પટેલે આગાહી કરી છે. જેમાં અરબ સાગરમાં સિસ્ટમ સક્રીય થતા રાજ્યમાં વરસાદી ઝાપટા પડી શકે છે. કચ્છ, સૌરાષ્ટ્ર અને દક્ષિણ ગુજરાતના મોટા ભાગના વિસ્તારોમાં વરસાદ પડવાની શક્યતા છે. સાથે જ રાજ્યમાં ઉત્તર ભારત તરફથી આવતા પવનોના લીધે ઠંડીમાં વધારો થતા તાપમાન પણ નીચું જશે. ઉત્તરના પવનોના કારણે ઠંડી વધશે તેમજ બર્ફીલા પવનોના કારણે જાન્યુઆરીમાં ઠંડી પડશે. તેમણે ઉમેર્યું હતું કે, અરબ સાગરમાં બની રહેલી સીસ્ટમના કારણે કમોસમી વરસાદ વરસી શકે છે. 29 ડિસેમ્બરથી હવાનું હળવું દબાણ ઉભુ થશે જેને લઈ ગુજરાતના ઉત્તર પૂર્વીય ભાગો તથા કચ્છમાં કમોસમી વરસાદ સંભવાના છે. દક્ષિણ ગુજરાત અને દક્ષિણ સૌરાષ્ટ્રમાં કમોસમી વરસાદ સંભાવના છે.

30મી ડિસેમ્બર બાદ હવામાનમાં પલટો આવશે

જાન્યુઆરીના પ્રથમ સપ્તાહમાં લગભગ દેશના ઘણાં વિસ્તારોમાં હવામાનમાં પલટો આવશે.આ ઉપરાંત ગાત્રો થીજવતી ઠંડીમાં ધીમે ધીમે વધશે. 29મી ડિસેમ્બરથી ઠંડીનો ચમકારો જોવા મળી શકે છે. જ્યારે 30મી ડિસેમ્બરે હવામાનમાં પલટો જોવા મળશે અને વાદળછાયું વાતાવરણ જોવા મળી શકે છે. તો 11મી જાન્યુઆરી તેમજ 24મી જાન્યુઆરીએ ઠંડા પવન ફુંકાશે. ઉતરાયણ પૂર્વ વાતાવરણ વાદળછાયું જોવા મળી શકે છે.