બિપોરજોય વાવાઝોડા દરમિયાન લોકોને કોઈ પણ પ્રકારની સમસ્યાનો સામનો કરવો ન પડે તે માટે ખાસ પગલા ભરવામા આવી રહ્યા છે. વાવાઝોડાને જોતા ટેલિકોમ ઓથોરિટીએ એક મોટો નિર્ણય લીધો છે. આ અંતર્ગત જો વાવાઝોડા દરમિયાન મોબાઈલ નેટવર્ક બંધ રહેશે તો આવી સ્થિતિમાં લોકો કોઈ પણ મોબાઈલ કંપનીના નેટવર્કનો ઉપયોગ કરી શકશે.

લોકોના હિતમાં મોટો નિર્ણય  

રાજયમાં પ્રવર્તી રહેલ સંભવિત બિપરજોય વાવાઝોડા દરમિયાન અસરગ્રસ્ત જિલ્લાઓમાં ટેલિકોમ નેટવર્ક ખોરવાય તો નાગરિકો કોઈપણ ટેલિકોમ ઓપરેટર નેટવર્કનો ઉપયોગ કરી શકશે. દૂર સંચાર વિભાગના ગુજરાત લાયસન્સ સર્વિસ એરિયાઝ (GLSA) દ્વારા આ માહિતી આપવામાં આવી છે. ટેલિકોમ વિભાગના અધિકારીઓના તેમના જણાવ્યા પ્રમાણે બિપોરજોય વાવાઝોડા દરમિયાન સંભવિત અસરગ્રસ્ત વિસ્તારોના નાગરિકોને કોઈ તકલીફ ન પડે તેને ધ્યાનમાં લઇ ટેલિકોમ સેવાઓએ આ મહત્વનો નિર્ણય કર્યો છે.

આ રીતે લઈ શકાશે લાભ

જો કોઈ નાગરિકે સબસ્ક્રાઈબ કરેલી ટેલિકોમ સેવા કામ ન કરે અથવા અસ્થાઈ રીતે બંધ હોય તો બીજા કોઈ પણ ટેલિકોમ ઓપરેટરની સેવાનો ઉપયોગ કરી શકે તેવી વ્યવસ્થા ગોઠવવામાં આવી છે. આ સેવાનો લાભ લેવા મોબાઇલ સેટિંગ્સ > સિમ કાર્ડ > મોબાઇલ નેટવર્કને મેન્યુઅલી પસંદ કરવાનું રહેશે. આ સેવાઓ કચ્છ, દેવભૂમિ દ્વારકા, પોરબંદર, જામનગર, રાજકોટ, જૂનાગઢ અને મોરબી જિલ્લામાં 17 જૂન 2023ના રોજ રાત્રે 11:59 વાગ્યા સુધી ઉપલબ્ધ રહેશે.