રાજ્યમાં અસામાજીક તત્ત્વો દિવસેને દિવસે બેફામ બની રહ્યા હોય તેવું લાગી રહ્યું છે. બર્થ -ડે સેલિબ્રેશનના અનેક વીડિયો સામે આવતા હોય છે જેમાં રસ્તાની વચ્ચો વચ કેક કાપવામાં આવે છે. ત્યારે આવી જ એક ઘટના રાજકોટમાં બની છે. શહેરના સ્વામિનારાયણ ચોકમાં રસ્તા વચ્ચે 5 કાર ઉભી રાખી બર્થ-ડે સેલિબ્રેટ કર્યો હતો. જેને કારણે ટ્રાફિક જામની સમસ્યા ઉભી થઈ હતી. પોલીસે રોકવાનો પ્રયાસ કરતા ઘર્ષણ સર્જાયું હતું. આ મામલે પોલીસે નવ લોકો સામે ગુન્હો નોંઘ્યો છે જેમાંથી 4 આરોપીઓને ઝડપી પાડ્યા છે જ્યારે બાકી લોકોની શોધખોળ ચાલું છે.  

રસ્તા વચ્ચે ગાડી ઉભી રાખી બર્થડે કર્યો સેલિબ્રેટ

રસ્તા પર બર્થ-ડે સેલિબ્રેટ કરવાનો ટ્રેન્ડ બની ગયો હોય તેવું લાગી રહ્યું છે. એવા અનેક વીડિયો તેમજ ઘટનાઓ સામે આવતી હોય છે જેમાં રસ્તાની વચ્ચો વચ ગાડી પર કેક રાખી કાપવામાં આવતી હોય છે. આ ઘટનાને લઈ ટ્રાફિકજામની સમસ્યા ઉભી થાય છે જેને કારણે લોકોને મુશ્કેલી વેઠવાનો વારો આવે છે. ત્યારે આવી જ ઘટના રાજકોટ શહેરમાં બની છે. શહેરના સ્વામિનારાયણ ચોકમાં રસ્તા વચ્ચે પાંચ ગાડી ઉભી રાખીને બર્થ-ડે સેલિબ્રેટ કરવામાં આવ્યો હતો.    

વિશાલના અનેક વીડિયો થયા છે વાયરલ 

જાહેર રસ્તા પર કેક કાપવામાં આવતા ટ્રાફિક જામ સર્જાયો હતો. જેને લઈ પોલીસને આ અંગે જાણ કરવામાં આવી હતી. પોલીસે આવી ગાડીને હટાવવાનું કહ્યું. જે બાદ મુખ્ય આરોપી વિશાલ અને તેના ભાઈ ઈશાને પોલીસ સાથે ઘર્ષણ કર્યું. વિશાલના અનેક વીડિયો સોશિયલ મીડિયા પર વાયરલ થઈ રહ્યા છે જે જોતા લાગે છે કે વિશાલને પોલીસનો ડર જ નથી. વાયરલ થયેલા વીડિયોમાં વિશાલ દારૂ પીતો, કારમાં દારૂની બોટલ દેખાડતો અને બંદુક સાથેના વીડિયો તેમજ ફોટો વાયરલ થઈ રહ્યા છે. 

પોલીસે ઝડપી લીધા ચાર આરોપીઓને   

ત્યારે બર્થ ડે સેલિબ્રેશનને લઈ પોલીસે એક્શન લીધા છે. પોલીસ સાથે પણ ગેરવર્તન કરવામાં આવ્યું હતું. તે ઉપરાંત સ્પ્રેથી જોખમી આગ લગાડી રસ્તા પર ડાન્સ કરતા હતા. જેને કારણે વાહનચાલકોને મુશ્કેલી વેઠવાનો વારો આવ્યો છે. આ સમગ્ર ઘટનાના વીડિયો પણ સામે આવ્યા છે. તે ઉપરાંત પોલીસ સાથે પણ ઝપાઝપી થઈ છે. આ ઘટનાને લઈ પોલીસે 9 લોકો વિરુદ્ધ ગુન્હો નોંધ્યો છે જેમાંથી 4 આરોપીઓને પોલીસે પકડી પાડ્યા છે. અને અન્ય પાંચ આરોપીની શોધખોળ ચાલી રહી છે. આ મામલામાં મુખ્ય આરોપી વિશાલ અને ઈશાન વિરુદ્ધ દારૂ,ગેરકાયદેસર હથિયાર રાખવા સહિતના ગુન્હાઓ નોંધ્યા છે.