સરકારી તંત્રમાંથી ભ્રષ્ટાચાર દૂર થાય તે માટે રાજ્ય સરકાર દ્વારા ઝીરો ટોલરન્સની નીતિ અપનાવવામાં આવી છે. સરકારના તમામ વિભાગોમાંથી લાંચની બદી દૂર થાય તે માટે ગુજરાત ACB ટ્રેપ ગોઠવીને લાંચિયા અધિકારીઓને ઝડપી પાડે છે. વડોદરામાં એક સિનિયર ક્લાર્ક લાંચ લેતા ઝડપાયો છે. વડોદરા ACBએ સિનિયર ક્લાર્ક પરેશ ગાંધીની ધરપકડ કરી હતી.

ACBએ ટ્રેપ ગોઠવી દબોચ્યો

વડોદરા જિલ્લાના પાદરા તાલુકાના જાસપુરની સરકારી શાળામાં પરેશ ગાંધી સિનિયર ક્લાર્ક તરીકે ફરજ બજાવે છે. ફરિયાદીએ જન્મના દાખલા માટે કોર્ટમાં અરજી કરી હતી. કોર્ટે અરજી સંદર્ભે સિનિયર ક્લાર્કને હાજર રહેવા આદેશ કર્યો હતો. કોર્ટના આદેશ છતાં દાખલા માટે તેમણે ફરિયાદી પાસે 400 રૂપિયાની લાંચ માંગી હતી. ફરિયાદી લાંચ આપવા માંગતા ન હોવાથી તેમણે ACBને જાણ કરી હતી. ACBએ ટ્રેપ ગોઠવીને કોર્ટ બહાર પગથિયાં પર જ લાંચ લેતા સિનિયર ક્લાર્કને રંગેહાથ ઝડપી લીધો હતો. આ ઘટના બની ત્યારે આસપાસના લોકો પણ એકઠા થઈ ગયા હતા, તેમણે ACBની કાર્યવાહીને બિરદાવી હતી.