સરકારી અધિકારી બનીને છેતરપિંડી કરવાનો સિલસિલો યથાવત હોય તેવું લાગી રહ્યું છે. થોડા સમય પહેલા જ કિરણ પટેલે નકલી પીએમઓ અધિકારી બનીને લોકો સાથે છેતરપિંડી આચરી હતી. ત્યારે હવે વધુ એક ઠગ અધિકારીને ઝડપી પાડ્યો છે. છેતરપીંડી કરનાર આરોપીને અમદાવાદ ક્રાઈમ બ્રાન્ચે ઝડપી લીધો છે. નિવૃત્ત સીબીઆઈ ઓફિસરનું નામ લઈ પોલીસના ડ્રેસવાળું આઈડી કાર્ડ બનાવીને સીબીઆઈ ઓફિસર બનીને ચેકિંગના બહાને બેગમાં રહેલા પૈસા, દાગીનાને પડાવી લેતો હતો. મહત્વનું છે કે જે જગ્યાએ આ ચેકિંગ કરવામાં આવી રહ્યું હતું તે જગ્યાથી પોલીસ સ્ટેશન માત્ર 500-1000 મીટર જ દૂર હતું.

નકલી CBI અધિકારીની ઓળખ આપી લોકોને ઠગયા!

તાજેતરમાં જ મહાઠગ કિરણ પટેલનો કિસ્સો આપણી સામે આવ્યો હતો. નકલી પીએમઓ અધિકારી બની લોકોને ઠગતો હતો. જમ્મુ કાશ્મીર જઈ અનેક બેઠકો પણ કરી હતી. આ પર્દાફાશ ઘણા સમય બાદ થયો હતો પરંતુ હાલ તેની વિરૂદ્ધ કાર્યવાહી કરવામાં આવી રહી છે. ત્યારે અમદાવાદ ક્રાઈમ બ્રાન્ચે લોકો સાથે છેતરપિંડી કરતા ઠગને પકડી પાડ્યો છે. સીબીઆઈ ઓફિસરની ઓળખાણ આપી લોકો પાસેથી પૈસા, દાગીના સહિતની કિંમતી વસ્તુ પડાવી લેતો હતો. ચેકિંગના બહાને વૃદ્ધો, મહિલાઓને તેમજ ધનિક લોકોને છેતરતો હતો. મહત્વનું છે કે જે જગ્યા પર ઉભા રહી તે લોકોને લૂંટતો હતો તે જગ્યાએથી થોડા મીટર દૂર જ પોલીસ સ્ટેશન આવેલું છે. પોલીસ ડ્રેસ પહેરી ડીસીપી હોવાની ઓળખાણ આપતા સુલતાનખાનને પકડી પાડ્યો છે. 

અનેક રાજ્યોના લોકોને આરોપીએ ઠગ્યા છે!

જે ઠગને પકડવામાં આવ્યો છે તે ઈરાની ગેંગનો લીડર છે. અને આ ગેંગે ન માત્ર ગુજરાતમાં પરંતુ દેશના વિવિધ રાજ્યોના લોકોને ઠગ્યા છે. દેશના અનેક રાજ્યોના લોકોને પોતાનો શિકાર બનાવ્યો છે. અમદાવાદ ક્રાઈમ બ્રાન્ચની પકડમાં આવ્યા બાદ ગેંગના લીડરે અનેક ચોંકાવનારા ખુલાસા કર્યા છે અને અત્યાર સુધીમાં કેટલા અને ક્યાં ગુન્હાઓ આચર્યા છે તેની માહિતી આપી છે. ત્યારે મળતી માહિતી અનુસાર પંજાબમાં 9, ઉત્તરપ્રદેશમાં 3, મધ્યપ્રદેશમાં 4, ઓરિસામાં બે, હરિયાણામાં 8, દિલ્હીમાં 2 ગુન્હાઓ આચર્યા હતા. મહત્વનું છે પોલીસ આ મામલે ગેંગના સભ્યોની ધરપકડ કરી રહી છે.