તહેવારોની સીઝનમાં લોકો જીવન જરૂરીયાતની ચીજોના વધેલા ભાવ ત્રસ્ત છે. અનાજ, કઠોળ, ગેસ સિલિન્ડર, સીંગતેલ, શાકભાજી સહિતની ચીજોની કિંમત આસમાને પહોંચી છે. દિવાળીના તહેવારમાં લોકો ફટાકડાની ખરીદી કરતા હોય છે પણ ફટાકડાના ભાવ પણ 40 ટકા જેટલા વધ્યા છે. ફટાકડાના ભાવમાં દર વર્ષે સામાન્ય રીતે  પાંચ થી 10 ટકાનો ભાવ વધારો થતો હોય છે. જો કે આ વર્ષે ફટાકડાના ભાવમાં લગભગ 40 ટકા જેટલો વધારો જોવા મળ્યો છે. 

રાજ્યના વિવિધ શહેરોમાં ફટાકડાના વેચાણ પર અસર

ગુજરાતના અમદાવાદ, સુરત, વડોદરા અને રાજકોટ સહિતના મોટા શહેરોમાં ફટાકડાની ખરીદી ઓછી જોવા મળી છે. વેપારીના કહેવા પ્રમાણે લોકો ફટાકડા ખરીદવા આવે છે પણ ભાવ સાંભળીને ખરીદી ટાળે છે. કેટલાક લોકો ફટકડાની ઓછી ખરીદી કરી રહ્યા છે.  લોકો ટેટા, સુતર બોમ્બ, આતિશબાજી, શંભુ સહિતના ફટાકડાઓ ખરીદી રહ્યા છે. તો નાના બાળકો તારા મંડળ, કોઠી, ચકેડી, પેન્સિલ, ફેન્સી આઈટમ, ગોલ્ડન લાયન કોઠીની ખરીદી પર પસંદગી ઉતારી રહ્યાં છે. જો કે એ પણ સાચું છે  કે લોકો જરૂર કરતા અડધા જ ફટાકડા ખરીદે છે. આ વર્ષે ફટાકડા ફોડવામાં જાગૃતિ આવી છે. લોકો ઓછું પ્રદૂષણ કરનારા ગ્રીન ફટાકડાની વધુ ખરીદી કરી રહ્યા છે. 

શા માટે ફટાકડાના ભાવ વધ્યા?

ફટાકડાના ભાવમાં આટલો જબદસ્ત વધારો થવાનું કારણ રો મટેરિયલના કિંમતમાં વધારો, તમિલનાડુના શિવાકાશીમાં વરસાદના કારણે ફટાકડાનું ઓછું ઉત્પાદન થતાં ફટાકડાની અછત સર્જાતા ભાવમાં આટલો તોતિંગ વધારો થયો છે.