સમયાંતરે ગુજરાતમાં રાજકારણના અલગ અલગ રંગ જોવા મળે છે. સત્તા પર આવવા અથવા તો પોતાના ઉમેદવારને જીત અપાવવા ભારતીય જનતા પાર્ટી સામ, દામ.દંડ ભેદનો ઉપયોગ કરવામાં માહેર છે. આ વાત બધા જાણે છે. હાલ ગુજરાતનું રાજકારણ ગરમાયું છે ત્યારે વાત આજે 1990માં ભાજપે કરેલી કુટનીતિની કરવી છે. 1991માં જ્યારે લોકસભા ચૂંટણી યોજાવાની હતી. ત્યારે આ ચૂંટણીમાં વડોદરામાં ભાજપના ઉમેદવારને લોકોનું સમર્થન મળે તે માટે પાર્ટીમાં મનોમંથન થયું હતું. ત્યારે રામાનંદ સાગરની રામાયણમાં સીતાનું પાત્ર ભજવનાર દીપિકા ચિખલિયાને ચૂંટણી માટે મેદાનમાં ઉતાર્યા હતા. દીપિકાની છબી સીતા તરીકે પ્રખ્યાત હતી તે માટે તેમને સંપૂર્ણ જનસમર્થન મળ્યું હતું. પહેલી વાર રાજકારણમાં પગ મૂકનાર દીપિકાને 1991માં 49.98 ટકા વોટ મળ્યા હતા. 

મનોમંથન બાદ ભાજપે વડોદરા બેઠક માટે કરી દીપિકાની પસંદગી  

આ વાત છે 1990 માર્ચની.જ્યારે ચિમનભાઈ પટેલ ગુજરાતના મુખ્યમંત્રી હતા. જનતા દળે ભાજપના સમર્થન દ્વારા સરકાર ઘડી હતી. પરંતુ તે વખતે રામ મંદિર માટે થનાર આંદોલને વેગ પકડ્યો હતો. જેને કારણે ભાજપના અનેક મંત્રીઓએ રાજીનામું આપી દીધું હતું. જે બાદ સરકાર પડી જતા તેમણે કોંગ્રેસ સાથે ગઠબંધન કર્યું હતું. સત્તા પરથી ભાજપ વિપક્ષમાં આવી ગઈ હતી. ત્યારે 1991માં યોજાનારી લોકસભા ચૂંટણીમાં સારું પ્રદર્શન કરવું એ ભાજપ માટે મોટો પડકાર હતો. વડોદરા લોકસભા પરથી કયા ઉમેદવારને મેદાનમાં ઉતારવા તે માટે પાર્ટીમાં અનેક વખત ચર્ચાઓ થઈ. નલિન ભટ્ટના નામ પર પાર્ટી વિચારણા કરી રહી હતી. પરંતુ સારૂ જનસમર્થન મળે તેવા ઉમેદવારની તલાશમાં પાર્ટી હતી. 

લાલ કૃષ્ણ અડવાણી તેમજ નરેન્દ્ર મોદીની હાજરીમાં ભર્યું હતું ફોર્મ

ચર્ચા વિચારણા થયા બાદ વડોદરા લોકસભા બેઠક માટે એકદમ લોકપ્રિય વ્યક્તિની પસંદગી કરવામાં આવી હતી. આ લોકપ્રિય ઉમેદવાર હતા રામાયણમાં સીતાનું પાત્ર ભજવનાર દીપિકા ચિખલિયા. દીપિકા પોલિટિક્સમાં આવવાનું વિચારી જ રહી હતી. તેમને પંચમહાલથી ચૂંટણી લડવી હતી પરંતુ ભાજપે તેમને વડોદરા ખાતેથી ચૂંટણી મેદાનમાં ઉતાર્યા. દીપિકાએ ભાજપના વરિષ્ઠ નેતા એવા લાલ કૃષ્ણ અડવાણી તેમજ હાલના વડાપ્રધાન નરેન્દ્ર મોદીની હાજરીમાં ફોર્મ ભર્યું હતું. જ્યારે પણ દીપિકા પ્રચાર માટે આવતા હતા ત્યારે લોકો તેમને સીતા સમજી પગે પડતા હતા. તેમને ભારે જન સમર્થન મળ્યું હતું. 

દીપિકાને કારણે વડોદરામાં કમળ ખીલ્યું હતું 

ભાજપના આવા માસ્ટર સ્ટ્રોકથી કોંગ્રેસને ઘણું નુકસાન થયું હતું. કોંગ્રેસે વડોદરાથી રણજિત સિંહ ગાયકવાડને ઉમેદવાર તરીકે જાહેર કર્યા હતા. પરંતુ દીપિકાની લોકચાહનાને કારણે બે વખત સાંસદ રહી ચૂકેલા રણજિત સિંહને હારનો સામનો કરવો પડ્યો હતો. વડોદરામાં પહેલી વખત દીપિકાને કારણે કમળ ખીલ્યું હતું, જે બાદ વડોદરા ભાજપનું ગઢ બની ગયું હતું. જ્યારે પ્રથમ વખત દીપિકા ચિખલિયા સાંસદ બન્યા તે વખતે તેઓ માત્ર 26 વર્ષના હતા. દીપિકાની લોકપ્રિયતાને કારણે ભાજપને ઘણો માટો ફાયદો થયો છે જ્યારે કોંગ્રેસને ઘણું મોટું નુકસાન ભોગવવાનો વારો આવ્યો છે.