ગુજરાત સરકારે ગાંધીનગર નજીક આવેલી ગિફ્ટ સીટીમાં દારૂના સેવનની મંજુરી આપી ત્યારથી આ મુદ્દો સમગ્ર રાજ્યમાં ચર્ચાનો વિષય બન્યો છે. હવે ગિફ્ટ સિટીના વિકાસ માટે સરકારે આજે વધુ એક મહત્વનો નિર્ણય લીધો છે. 35 એકરમાં ફેલાયેલી ગિફ્ટ સિટીનું વિસ્તરણ કરવા માટે અને તેના વધુ વિકાસ માટે આ સિટીમાં ગાંધીનગર તાલુકાના ચાર ગામને સમાવવાનો નિર્ણય લેવામાં આવ્યો છે.આ ચાર ગામોનો 122 એકર વિસ્તાર ગિફ્ટ સિટીની અંદર આવરી લેવામાં આવશે. 

આ ગામોનો થશે સમાવેશ

ગિફ્ટ સિટીના વિકાસ અને વિસ્તાર માટે ગાંધીનગરના શાહપુર, ડભોડા, લવારપુર અને વલાદ ગામ ગિફ્ટ સિટીમાં ભેળવવામાં આવી શકે છે. સૂત્રો દ્રારા મળતી માહિતી મુજબ અહીં ગિફ્ટ સિટીની અંદર મિની એયરપોર્ટનું  પણ  નિર્માણ કરવામાં આવશે, ઉપરાંત ગિફ્ટ સિટીની અંદર ચારથી છ ફાઈવ સ્ટાર હોટલ પણ બનશે. આગામી દિવસોમાં ગિફ્ટ સિટીનો વિસ્તાર વધારીને 157 એકર કરવાનું નક્કી કરવામાં આવ્યું છે.  

ટૂંક સમયમાં નોટિફિકેશન જાહેર થશે

રાજ્યના નશાબંધી અને આબકારી વિભાગે શુક્રવારે ગાંધીનગરના ગિફ્ટ સિટીમાં દારૂ વહેંચવા અને પીવા પર મંજૂરની મોહર લગાવી છે. જો કે, ગિફ્ટ સિટીમાં દારૂ પીવાશે, પરંતુ પીધા બાદ બહાર આવવાને લઈને સસ્પેન્સ છે. નશાબંધીની ધારા 24-1-ખ અંતર્ગત દારૂ પીને ગુજરાતમાં પ્રવેશ પર પ્રતિબંધ છે. આ મામલે વિગતવાર ટૂંક સમયમાં નોટિફિકેશન જાહેર થઇ શકે છે. નોંધનિય છે કે, નશાબંધીની ધારા 24-1-ખને ધ્યાનમાં રાખી નિયમો  તૈયાર થશે.  મુંબઈની જેમ ગિફ્ટ સિટીમાં પણ FL3 લાયસન્સ સાથે દારૂ પીરસવાનો પરવાનો આપવામાં આવ્યો છે. રાજ્યમાં હાલ FL1 અને FL2 પ્રકારના લાયસન્સ અપાયા છે. FL1  લાયસન્સ હોલ્ડરને દારૂ હોલસેલમાં વેચવાનો પરવાનો આપે છે. FL2 લાયસન્સ અંતર્ગત પરમિટ ધરાવનારાઓને રિટેલ દારૂ વેચવાનો પરવાનો મળે છે FL3 લાયસન્સ અંતર્ગત પરવાનાના નિયમો તૈયાર થઈ રહ્યા છે. ગિફ્ટ સિટીની હોટલ, ક્લબ, રેસ્ટોરન્ટોને  FL3 લાયસન્સના પરવાના હેઠળ દારૂ પીરસવામં આવશે.