ગુજરાત વિધાનસભાની ચૂંટણી નજીક આવી રહી છે ત્યારે ડ્રગ્સનો મુદ્દો ભારે ચર્ચાસ્પદ બન્યો છે. ડ્રગ્સ મુદ્દે ભાજપ સરકાર પર પણ આ વિરોધપક્ષો દ્વારા માછલા ધોવાતા રહ્યા છે. ડ્ર્ગ્સ માફિયાઓ સામે રાજ્ય સરકારની કાર્યવાહીને લઈ ગૃહરાજ્યમંત્રી હર્ષ સંઘવીએ મહત્વનું નિવેદન આપ્યું છે. સંઘવીએ કહ્યું કે 'ગુજરાત પોલીસે એક વર્ષમાં 6500 કરોડનું ડ્રગ્સ પકડ્યું છે. જેનાથી પાકિસ્તાન-અફઘાનિસ્તાન જેવા દેશોને પણ ઝટકો લાગ્યો છે. કલકતામાં DRI સાથે મળીને 39 કિલો 280 કરોડનું ડ્રગ્સ ઝડપાયું છે. આ ડ્રગ્સ કોઈ સામેથી નથી મૂકી જતું, ગુજરાત પોલીસ સાહસ સાથે ડ્રગ્સ પકડે છે એટલે પકડાય છે, ગુજરાત જ નહીં અનેક રાજ્યોનું ડ્રગ્સ નેટવર્ક પોલીસે તોડ્યું છે. ગુજરાત પોલીસ કેન્દ્રની એજન્સી સાથે મળીને કામગીરી કરી રહી છે. ગુજરાત ATS વિવિધ એજન્સીઓ સાથે મળી પાકિસ્તાન બોર્ડર ઉપર કામગીરી કરી રહી છે.'

સંઘવીએ પોલીસને આપ્યા અભિનંદન

 હર્ષ સંઘવીએ ડ્રગ્સ પકડવા મામલે ગુજરાત પોલીસના સાહસને બિરદાવી તમામ જવાનોને અભિનંદન આપ્યા હતાં. તેમણે કહ્યું કે  અમે ડ્રગ્સ પકડીએ છીએ, એટલે આંકડા દેખાય છે. આ આંકડા ભલે વધે પણ અમારૂં અભિયાન આવી જ રીતે ચાલશે. જે રાજકારણ રમે છે તેમના રાજ્યમાં તો કંઈ કરતા નથી. હું ગુજરાત પોલીસના તમામ જવાનોને ખૂબ-ખૂબ અભિનંદન આપું છું અને આગામી સમયમાં ડ્રગ્સ વિરોધી લડાઈ હજુ મજબૂતાઈથી લડીશું અને હજુ ડ્રગ્સના નેટવર્કને તોડીશું.'

ડ્રગ્સ મુદ્દે રાજનીતિ યોગ્ય નથી: સંઘવી

ડ્રગ્સ મુદ્દે રાજકારણ રમતા વિરોધ પક્ષો પર આકરા પ્રહાર કરતા ગૃહરાજ્યમંત્રીએ કહ્યું કે, 'ડ્રગ્સ જેવા મુદ્દે રાજનીતિ કરવી યોગ્ય નહીં. ડ્રગ્સની રકમ ક્યાં ઉપયોગ થાય છે એ સૌ જાણે છે. પોલીસની કામગીરી કેટલાકને પેટમાં દુ:ખે છે. પાકિસ્તાની ડ્રગ્સ ડિલરોને ફાયદો થાય તેવું કામ કરનારા ચેતી જાય. ગુજરાત પોલીસે નવી દિલ્લી ક્રાઇમ બ્રાન્ચ સાથે મળી મોટું ઓપરેશન પર પાડ્યું હતું. વહદ ઉલ્લા ખાન નામના અફઘાન નાગરિકને પકડવામાં આવ્યા. દિલ્લી પોલીસને લિંકમાં 1000 કરોડનું વધારાનું દ્રગ મળ્યું. જખાઉમાં 1480 કરોડનું ડ્રગ પકડાયું. ડ્રગ સાથે જે લોકોને પકડવામાં આવ્યા તે આંતરરાષ્ટ્રીય ગેંગ ના સભ્યો છે.