મણિપુરમાં છેલ્લા અનેક મહિનાઓથી હિંસા ફાટી નીકળી છે. હિંસામાં અનેક લોકોએ પોતાના જીવ ગુમાવ્યા છે. મણિપુરમાં મામલો શાંત થાય તે માટે અનેક સમય સુધી ઈન્ટરનેટ સેવા બંધ રાખવામાં આવી હતી. સુરક્ષાબળોને પણ તૈનાત કરવામાં આવ્યા હતા પરંતુ પરિસ્થિતિમાં કોઈ અંતર આવ્યો ન હતો. ઈન્ટરનેટ સેવા શરૂ થતાં જ મહિલાઓનો એક વીડિયો વાયરલ થયો હતો જેમાં તેમને નગ્ન કરી તેમની પરેડ નીકાળવામાં આવી હતી. વીડિયો સામે આવ્યા બાદ દરેક લોકોમાં રોષ ભભૂકી ઉઠ્યો હતો. સંસદમાં પણ આ મામલે હોબાળો થતાં સંસદની કાર્યવાહી સ્થગિત થતી હોય છે. વીડિયો સામે આવ્યા બાદ આ મામલો સુપ્રીમ કોર્ટ પહોંચ્યો છે અને ગઈકાલથી આ કેસમાં સુનાવણી કરવામાં આવી છે.

બે વાગ્યે થશે આગળની સુનાવણી 

આજે પણ આ મામલે સુપ્રીમ કોર્ટમાં સુનાવણી હાથ ધરવામાં આવી હતી. કોર્ટે પીડિત મહિલાનું નિવેદન ન લેવા માટે સીબીઆઈને આદેશ કર્યો છે. મહિલાનું નિવેદન રેકોર્ડ કરવા પર રોક લગાવી દીધી છે. સીજેઆઈએ કહ્યું કે હમણાં સીબીઆઈ મહિલાઓનું નિવેદન રેકોર્ડ ન કરે. આજે બે વાગ્યે આ કેસમાં આગળની સુનાવણી હાથ ધરવામાં આવવાની છે.    

ગઈકાલે સુપ્રીમ કોર્ટમાં આવી થઈ હતી દલીલ 

ગઈકાલની સુનાવણીમાં સુપ્રીમ કોર્ટની બેન્ચે તેમ પણ કહ્યું હતું કે અન્ય રાજ્યોમાં પણ આવું જ થાય છે તેમ કહીંને મણિપુરની ઘટનાને ન્યાયીક ઠરાવી શકાય નહીં. અમે અહીં રાજ્યમાં મહિલા સાથે થયેલા જઘન્ય અપરાધની સુનાવણી કરી રહ્યા છીએ. આ પ્રકારના ગુના બંગાળમાં પણ થાય છે તેવું કહીં શકાય નહીં. આ કેસ તદ્દન અલગ છે. તમે અમને કહો કે મણિપુર કેસમાં તમારા સુચનો શું છે?