કચ્છ જિલ્લાના ગાંધીધામ  ભાજપ કાર્યાલયની બહારથી જે દ્રશ્યો સામે આવ્યા છે તે  જોઈ તમને થશે કે દારૂબંધી કાયદાના લીરેલીરા ફરી ઉડ્યા. દારૂબંધી કાયદાના લીરેલીરા ઉડવા તો જાણે સામાન્ય બની ગયું છે તેવું લાગે છે હવે. પ્રતિદિન કોઈને કોઈ જગ્યાએથી કાંતો દારૂડિયા પકડાય છે અથવા તો દારૂની બોટલ ઝડપાય છે. આવા દ્રશ્યો જ્યારે અમે તમને બતાવીએ છીએ ત્યારે તમે કહેતા હશો કે કંઈક નવું બતાવો આવું થવું તો સામાન્ય છે. આ દ્રશ્યો આમ તો સામાન્ય જોવામાં લાગે છે પરંતુ હવે ચૂંટણી નજીક આવી રહી છે. અને આ જે દ્રશ્યો સામે આવ્યા છે તે ભાજપ કાર્યાલયની બહારના છે.

ભાજપના કાર્યાલયની બહાર જોવા મળી દારૂની બોટલ!

લોકસભાની ચૂંટણી ગમે ત્યારે જાહેર થઈ શકે છે. ચૂંટણી પહેલા ભારતીય જનતા પાર્ટીએ ચૂંટણી લક્ષી કાર્યાલયને ખુલ્લા મૂક્યા છે. આપણે ત્યાં એવું માનવામાં આવે છે કે ગરીબ મતદાતાઓને દારૂની પોટલી,ચવાણું આપી દેવામાં આવે તો તે વ્યક્તિ તે પાર્ટીના પક્ષમાં વોટ કરતો હોય છે! ચૂંટણી વખતે સૌથી વધારે રોજગારીનું સર્જન ચૂંટણી વખતમાં થાય છે કારણ કે કાળા નાણાઓ બહાર આવે છે. આ સમય દરમિયાન વ્યાપક પ્રમાણમાં કાળા નાણાનો ઉપયોગ થાય છે. આપણે પણ અનેક વખત જાતિ અને ધર્મના આધારે વોટ આપીએ છીએ. 

ચૂંટણી નજીક આવતા આવા દ્રશ્યો અનેક વખત જોવા મળશે!

જેમ જેમ ચૂંટણી નજીક આવશે તેમ તેમ દારૂનું વેચાણ પણ વધશે. આવા વીડિયો અનેક વખત જોવા પણ મળશે. ગુજરાતમાં કહેવા માટે તો દારૂબંધી છે પરંતુ તેનો કેટલો અમલ થાય છે તે આપણે અનેક વખત જોઈ ચૂક્યા છે. ગાંધીધામ ભાજપના કાર્યાલય બહારથી દારૂની બોટલના દ્રશ્યો સામે આવતા અનેક સવાલો ઉભા કરે છે. ચૂંટણી સમયે આવા વીડિયો સામે આવતા એટલું કહી શકાય કે ભૂખ્યા જનોનો જઠરાગ્નિ જાગશે અને પછી દારૂ પીને સૂઈ જશે..!