ગુજરાતમાં હજી સુધી આપણે નકલી સીએમઓ અધિકારી, નકલી પીએમઓ અધિકારી, ડમી વિદ્યાર્થીઓ વગેરે વગેરે સાંભળતા હતા. પરંતુ હવે તો ઠગાઈની તમામ હદ પાર થઈ ગઈ હોય તેવું લાગે છે. આ વખતે નકલી અધિકારી નહીં પરંતુ નકલી સરકારી ઓફિસ ઝડપાઈ છે. મળતી માહિતી અનુસાર છોટા ઉદેપુર જિલ્લામાં છેતરપીંડી કરવા બોડેલી તાલુકામાં એક નકલી સરકારી ઓફિસની ઠગોએ સ્થાપના કરી. પોતાને સરકારી અધિકારી તરીકે દર્શાવ્યા, બનાવટી સહી કરી, તેમજ સરકારી સિક્કા ઉપરાંત દસ્તાવેજો પણ બનાવી લીધા. ત્યાં સુધી તો ઠીક હતુ પરંતુ 4.15 કરોડની સરકારે કામ માટે ગ્રાન્ટ પણ ફાળવી લીધી. 

છોટા ઉદેપુરમાં આખે આખી નકલી સરકારી ઓફિસ ઝડપાઈ

ગુજરાતમાં નકલી અધિકારી પકડાવાનું તો સામાન્ય બન્યું છે પરંતુ હવે તો ઠગો તેમાંથી પણ આગળ નિકળ્યા છે.  દર વખતે અધિકારીઓ પકડાયા હોવાની વાત અમે કહેતા હોઈએ છીએ પરંતુ આ વખતે નકલી અધિકારી નહીં પરંતુ આખેઆખી નકલી સરકારી કચેરી ઠગોએ છોટાઉદેપુરમાં ઉભી કરી દીધી. એક નકલી સરકારી ઓફીસનો પર્દાફાશ થયો છે. જેમાં લાખો રુપિયાનો ચૂનો લગાવવામાં આવ્યો છે.  ખોટી સરકારી કચેરી ઊભી કરી ચાર કરોડ પંદર લાખનો સરકારને ચૂનો ચોપડયો છે. છોટાઉદેપુરમાં "કાર્યપાલક ઇજનેરશ્રી સિંચાઈ પ્રોજેક્ટ બોડેલી" નામની કચેરી બનાવી સરકારી ગ્રાન્ટ મેળવી લેતા હતા.

પોલીસે આરોપીની કરી લીધી ધરપકડ! 

આ મામલે જે વિગતો સામે આવી છે એ મુજબ આદિજાતિ વિભાગની પ્રાયોજના કચેરીમાંથી ગ્રાન્ટ મેળવી કૌભાંડ ચાલતું હતું સંદીપ રાજપૂત નામના આરોપીએ આ કૌભાંડ આચર્યું છે. સંદીપ રાજપૂત નામના આરોપીએ આ કૌભાંડ આચર્યું છે. સમગ્ર કૌભાંડ બહાર આવ્યા બાદ તપાસનો દોર શરૂ થઈ ગયો છે તેવી માહિતી સામે આવી રહી છે. આ કૌભાંડ સામે આવ્યા બાદ પોલીસે 170,419,465,467,468,471,472,474, 1NS, 20B મુજબ ગુનો દાખલ કર્યો છે. પોલીસે સંદીપ રાજપૂતની ધરપકડ કરી લીધી છે અને કાયદેસરની કાર્યવાહી હાથ ધરી છે.    

કેવી રીતે આચરવામાં આવ્યું સમગ્ર કૌભાંડ? 

હવે તમને થશે કે એટલું મોટું કૌભાંડ બહાર કઈ રીતે આવ્યું? તો તમને જણાવી દઈએ કે બોડેલીના સિંચાઈ વિભાગના કાર્યપાલક ઈજનેર ધવલ પટેલે નિવેદન આપ્યુ છે. તેમણે જણાવ્યુ હતુ કે, પ્રાયોજના વહીવટ અધિકારીના કામોના આયોજન માટે મીટીંગ બોલાવી ત્યારે આ ધ્યાને આવ્યું હતુ. મીટિંગમાં ટ્રાયબલના કામોની ચર્ચા કરી હતી. સિંચાઈ વિભાગની ખોટી દરખાસ્ત ધ્યાને આવતા આ મામલો સામે આવ્યો હતો. 

કોંગ્રેસ તેમજ આમ આદમી પાર્ટીએ આ મામલે સરકારને ઘેરી 

આ ઘટનાને લઈ રાજકીય પાર્ટીઓ દ્વારા સરકાર પર પ્રહાર કરવામાં આવી રહ્યા છે. આ મામલે સરકારને ઘેરવાનો પ્રયાસ કરાઈ રહ્યો છે. કોંગ્રેસ દ્વારા આ મામલે પ્રેસ કોન્ફરન્સ કરવામાં આવી હતી જેમાં રાજ્ય સરકાર પર પ્રહાર કરવામાં આવ્યા હતા. તે ઉપરાંત આમ આદમી પાર્ટીના ધારાસભ્ય ચૈતર વસાવાએ પણ ટ્વિટ કરી છે અને સરકારને ઘેરી છે. આ ઘટના બાદ શિક્ષણ મંત્રી કુબેર ડિંડોર દ્વારા આ મામલે નિવેદન આપવામાં આવ્યું છે. તેમણે કહ્યું કે જો અન્ય કોઈ જિલ્લામાં આવી નકલી સરકારી ઓફિસ ચાલતી હશે તો તે અંગે પણ તપાસ કરવામાં આવશે.