.jpg "The News Reporter")
GHIમાં 9.9થી ઓછો સ્કોર ધરાવતા દેશો લૉ રિસ્ક કેટેગરીમાં આવે છે
ચીનનો સ્કોર 5થી ઓછો, જે એશિયન દેશોમાં સૌથી સારો છે
બુરુન્ડુ, સોમાલિયા, સાઉથ સુદાન અને સિરિયાની સ્થિતિ અતિગંભીર ગણાવાઈ
121 દેશોમાંથી ભારત છેક 107મા ક્રમે, 2021ની સરખામણીએ ચાલુ વર્ષે દેશમાં સ્થિતિ વધુ વણસી, દેશમાં 22.4 કરોડ લોકો કુપોષિત. GHIમાં સામેલ એશિયાના 16 દેશોમાં ચીન સૌથી આગળ. આફ્રિકાના બુરુન્ડુ, સોમાલિયા, સાઉથ સુદાન અને ગલ્ફ દેશ સિરિયાની સ્થિતિ અતિગંભીર ગણાવાઈ. ઉંચાઈ અનુસાર વજન અને બાળમૃત્યુદરમાં ઘટાડા બાબતે ભારતનું પર્ફોમન્સ પ્રમાણમાં સુધરી રહ્યું છે.
ગ્લોબલ હંગર ઈન્ડેક્સમાં સામેલ 121 દેશોમાં ભારતનો ક્રમ છેક 107 આવ્યો છે. 29.1 સ્કોર સાથે ભારતમાં સ્થિતિ ગંભીર હોવાની ટકોર આ રિપોર્ટમાં કરાઈ છે. 2021માં ભારતનું સ્થાન 116 દેશોમાંથી 101મા ક્રમે હતું, જે ચાલુ વર્ષે સરકીને 107 પર પહોંચ્યું છે. ગ્લોબલ હંગર ઈન્ડેક્સ (GHI)દુનિયાભરના દેશો તેમજ પ્રાંતોમાં લોકોને કેટલા પ્રમાણમાં પૂરતો આહાર પ્રાપ્ત થાય છે તેના પર અભ્યાસ કરે છે. GHIમાં કુપોષણ, ઉંચાઈ અનુસાર વજન, ઉંમર અનુસાર ઉંચાઈ અને પાંચ વર્ષથી નાના બાળકોનો મૃત્યુદર એમ કુલ ચાર માપદંડોનો સમાવેશ કરવામાં આવે છે. ઉંમર અનુસાર ઉંચાઈ અને બાળ મૃત્યુદરમાં 2014થી GHIમાં ભારતનું પર્ફોમન્સ સતત સુધરી રહ્યું છે. જોકે, ઉંચાઈ અનુસાર વજન અને કુપોષણની બાબતમાં દેશની સ્થિતિ ખાસ નથી બદલાઈ.
ભારતનો સ્કોર 29.1 છે, જે તેને ગંભીર કેટેગરીમાં મૂકેછે. 9.9 કે તેનાથી ઓછો સ્કોર 'લો રિસ્ક'માં આવે છે, જ્યારે 35-49.9નો સ્કોર ચેતવણીરુપ અને તેનાથી વધુ સ્કોર અતિભયજનક સ્થિતિનો સંકેત આપે છે. 2022ના રેન્કિંગ પર નજર કરવામાં આવે તો ભારતના બાંગ્લાદેશ, શ્રીલંકા, નેપાળ, મ્યાનમાર, પાકિસ્તાન જેવા દેશો આ બાબતે ભારતથી સારી સ્થિતિમાં છે, જ્યારે 5થી ઓછા સ્કોર સાથે ચીન આ યાદીમાં સામેલ એશિયાના 16 દેશોમાં સૌથી ટોચ પર છે. જ્યારે બુરુન્ડુ, સોમાલિયા, સાઉથ સુદાન અને સિરિયાની સ્થિતિ અતિગંભીર ગણાવાઈ છે.
પૂર્વ કેન્દ્રિય નાણામંત્રી અને કોંગ્રેસના નેતા પી. ચિદમ્બરમે GHIમાં ભારતના સ્થાનને ગંભીર બાબત ગણાવતા પીએમ મોદી પર નિશાન તાક્યું હતું.
તેમણે જણાવ્યું હતું કે પીએમ નરેન્દ્ર મોદી ક્યારે કુપોષણ, ભૂખમરા તેમજ બાળમૃત્યુદર જેવા મુદ્દા પર વાત કરશે? દેશમાં 22.4 કરોડ લોકો કુપોષિત છે, દેશ ગ્લોબલ હંગર ઈન્ડેક્સમાં 121 દેશોમાંથી 107મા ક્રમે આવી અત્યારસુધીના સૌથી નીચલા સ્તરે પહોંચ્યો છે.સૌ પ્રથમ ગ્લોબલ હંગર ઈન્ડેક્સ 2006માં રિલીઝ કરવામાં આવ્યો હતો. તેનો હેતુ વૈશ્વિક, પ્રાંતિય અને રાષ્ટ્રીય સ્તરે લોકોને પોષણયુક્ત ભોજન કેટલા અંશે મળી રહે છે તેની સ્થિતિનું આકલન કરવા માટે થાય છે.
