રાજ્યમાં રખડતા ઢોરનો ત્રાસ પ્રતિદિન વધી રહ્યો છે. અનેક લોકો રખડતા ઢોરની અડફેટે આવી ઘાયલ થતા હોય છે અથવા તો મોતને ભેટતા હોય છે. હાઈકોર્ટ રખડતા ઢોર મામલે એકદમ કડક દેખાઈ રહી છે. રખડતાં ઢોરની સમસ્યાને લઈ ગુજરાત હાઇકોર્ટ દ્વારા કોર્પોરેશન અને પોલીસતંત્રની ઝાટકણી અવારનવાર કાઢવામાં આવે છે. ત્યારે હવે માલધારીઓ ગૌચરની જમીન મામલે આંદોલન પર ઊતરી આવ્યા છે. માલધારી એકતા સમિતિના પ્રમુખ નાગજી દેસાઈએ હવે અમદાવાદ મેયર ઓફિસનો ઘેરાવો કરવાની ચીમકી આપી છે. 

મેયરની ઓફિસમાં હજારો પશુપાલકો એકત્ર થશે!

 હાઈકોર્ટની અનેક ફટકાર બાદ તંત્ર એક્ટિવ મોડમાં દેખાયું હતું. રખડતા ઢોરથી રાહદારીઓને, વાહનચાલકોને મુક્તિ મળે તે માટે એક્શન પણ લેવાયા. અનેક વખત એવા દ્રશ્યો પણ સામે આવ્યા જેમાં ઢોરને પકડવા ગયેલી ટીમ પર હુમલો કરવામાં આવ્યો. નવી પોલીસીનો વિરોધ માલધારી સમાજના લોકો કરી રહ્યા હતા. ત્યારે માલધારી એકતા સમિતિ અમદાવાદ મેયર ઓફિસનો ઘેરાવો કરી શકે છે કારણ કે તેવી ચીમકી ઉચ્ચારવામાં આવી છે. માલધારીઓનું કહેવું છે અમે વર્ષોથી જ્યાં રહેતા હોઈએ અને પશુપાલનનો વ્યવસાય કરીયે છીએ એ જગ્યાના ટેક્સબિલ અને લાઈટબિલના આધારે અમને લાઇસન્સ-પરમિટ આપવામાં આવે. આધારકાર્ડ, લાઈટબિલ અને મ્યુનિસિપલ કોર્પોરેશનના ટેક્સ બિલમાં જે સરનામું છે, એ જગ્યા પર લાઇસન્સ આપવામાં આવે જેથી ઘર પાસે ઢોર બાંધીને રાખી શકે 

વિજય નહેરાને લઈ માલધારીઓએ કહી આ વાત

અમદાવાદમાં હજારો પશુપાલકો અમદાવાદ મેયરની ઓફિસે એકઠા થશે તેમનું કહેવું છે કે પશુ નોંધણીના નામે પરિવારદીઠ 200 રૂપિયા લેખે જે કરોડો રૂપિયા ઉઘરાવવામાં આવ્યા છે એનો હિસાબ માગવા માટે મંગળવારે સવારે અમે અમદાવાદ મ્યુનિસિપલ કોર્પોરેશનની દાણાપીઠ ઓફિસ ખાતે પહોંચીશું. ભૂતપૂર્વ મ્યુનિસિપલ કમિશનર વિજય નેહરાએ પશુ નોંધણીના નામે કરોડો રૂપિયા ઉઘરાવ્યા હતા, એની પહોંચ અમારી પાસે છે. 

માલધારીઓને આપવામાં આવી અંતિમ નોટિસ 

પશુત્રાસ અટકાવ પોલીસી અંતર્ગત માલધારીઓને મ્યુનિસિપલ કોર્પોરેશન દ્વારા ચેતવણી આપવામાં આવી હતી કે, 1 ડિસેમ્બર સુધીમાં માલધારીએ પોતાના ઢોરનું રજીસ્ટ્રેશન કરાવવાનું રહેશે તથા ઢોર રાખવા પોતાના ભોગવટાની એટલે કે માલીકીની જમીન હોવી આવશ્યક છે. જે માલધારી પાસે માલીકીની જમીન ન હોય તેઓએ શહેરની હદ છોડી જવાની અંતિમ નોટીસ પણ ગઈકાલે આપવામાં આવતા માલધારીઓ સરકાર પાસે ગૌચર ફાળવવાની માગ કરી રહ્યા છે. અમદાવાદ મહાનગરપાલિકા દ્વારા ઢોર નિયંત્રણ પોલીસી માટે અંતિમ નોટીસ પ્રસિદ્ધ કરવામાં આવી હતી. સાથે જ આગામી સપ્તાહથી એટલે કે, 1 ડિસેમ્બરથી રજીસ્ટ્રેશન વગરના પશુઓને પકડીને પશુમાલિક સામે કાર્યવાહી કરવાની ચેતવણી પણ આપવામાં આવી હતી. જેના પ્રતિસાદરૂપે માલધારી સમાજ પણ તંત્ર સામે લડી લેવાના મૂડમાં છે.