રાજ્યમાં મેઘરાજાએ ધમાકેદાર એન્ટ્રી કરી છે. સપ્ટેમ્બર મહિનામાં વરસાદની રિ-એન્ટ્રી થતાં જગતના તાતની ચિંતા ઓછી થઈ ગઈ છે. હવામાન નિષ્ણાત અંબાલાલ પટેલ દ્વારા સપ્ટેમ્બર મહિનાને લઈ આગાહી કરવામાં આવી હતી કે આ મહિનામાં અતિભારે વરસાદ  વરસી શકે છે જેને કારણે અનેક જગ્યાઓ પર પૂર જેવી સ્થિતિનું નિર્માણ થઈ શકે છે. હવામાનની સ્થિતિ પ્રમાણે હવામાન વિભાગ પણ વરસાદને લઈ આગાહી અપડેટ કરતું રહે છે. રાજ્યમાં ફરી જામેલા વરસાદી માહોલને જોતા હવામાન વિભાગ દ્વારા અનેક જગ્યાઓ પર એલર્ટ જાહેર કરવામાં આવ્યું છે. સોમવાર માટે કરવામાં આવેલી આગાહી અનુસાર આજે મધ્ય ગુજરાત, ઉત્તર ગુજરાતમાં ભારે વરસાદ વરસી શકે છે.

સપ્ટેમ્બર મહિનાએ ઘટાડી ખેડૂતોની ચિંતા 

જ્યારથી ચોમાસાની સિઝનની શરૂઆત થઈ છે ત્યારથી વરસાદ વરસી રહ્યો હતો પરંતુ ઓગસ્ટ મહિનામાં મેહુલો રિસાઈ ગયો હોય તેવું લાગ્યું હતું. ઓગસ્ટ મહિનો કોરોકટ સાબિત થયો હતો. ત્યારે ઓગસ્ટ મહિનાને કારણે ખેડૂતોની ચિંતા વધી હતી પરંતુ સપ્ટેમ્બર મહિનાએ ખેડૂતોની ચિંતા ઘટાડી છે. હવામાન વિભાગ દ્વારા કરવામાં આવેલીઆગાહી મુજબ અનેક જગ્યાઓ પર વરસાદ વરસી શકે છે. કોઈ જગ્યાઓ પર તો ભારેથી અતિભારે વરસાદની પણ સંભાવના વ્યક્ત કરવામાં આવી છે.  

આ જગ્યાઓ માટે અપાયું છે રેડ એલર્ટ 

આજ માટે કરવામાં આવેલી આગાહી મુજબ બનાસકાંઠા, સાબરકાંઠા, અરવલ્લીમાં રેડ એલર્ટ આપવામાં આવી છે. જેના કારણે આ વિસ્તારોમાં અત્યંત ભારે વરસાદની આગાહી કરવામાં આવી છે. ઓરેન્જ એલર્ટની વાત કરીએ તો પાટણ, મહેસાણા, ગાંધીનગર અને મહીસાગરમાં આપવામાં આવ્યું છે. જ્યારે કચ્છ, સુરેન્દ્રનગર, અમદાવાદ, ખેડા, પંચમહાલમાં યલો એલર્ટ એટલે આ વિસ્તારોમાં ભારે વરસાદની આગાહી આપવામાં આવી છે.