ગુજરાત એન્ટી ટેરરિસ્ટ સ્ક્વોડ (ATS) એ વડોદરા શહેરમાં એક કેમિસ્ટના ઘરેથી રૂ. 121.40 કરોડની કિંમતનો 24.28 કિલો મેફેડ્રોન અથવા MD ડ્રગ્સ જપ્ત કર્યું છે. વડોદરા શહેરની હદમાં આવેલા એક મેન્યુફેક્ચરિંગ યુનિટમાંથી રૂ. 478 કરોડની કિંમતનો મેફેડ્રોન અને તેનો કાચો માલ જપ્ત કર્યાના દિવસો બાદ મંગળવારે આ રિકવરી આવી છે. વડોદરા જિલ્લાના સિંધરોટ ગામની એક ફેક્ટરીમાં 29 નવેમ્બરની રાત્રે દરોડા દરમિયાન પકડાયેલા પાંચ વ્યક્તિઓમાંના શૈલેષ કટારિયાના ઘરેથી એટીએસ દ્વારા નશાકારક ડ્રગનો નવીનતમ સ્ટોક જપ્ત કરવામાં આવ્યો હતો.

પૂછપરછ દરમિયાન ડ્રગ્સનો જથ્થો પકડાયો

ATS અધિકારીઓએ જણાવ્યું હતું કે પૂછપરછ દરમિયાન, ડ્રગના વેપારીઓ દ્વારા ભાડે રાખવામાં આવેલા અને વ્યવસાયે કેમિસ્ટ કટારિયાએ પોલીસને માહિતી આપી હતી કે તેણે એમડી ડ્રગ્સનો મોટો જથ્થો રાખ્યો હતો, જે તેણે વડોદરા શહેરમાં તેના નિવાસસ્થાને સિંધરોટ સ્થિત ફેક્ટરીમાં તૈયાર કર્યું હતું. ATSની એક ટીમ તેમના નિવાસસ્થાને પહોંચી અને 121.40 કરોડ રૂપિયાની કિંમતનો 24.28 કિલો પ્રતિબંધિત પદાર્થ રિકવર કર્યું હતું. મેફેડ્રોન, જેને 'મ્યાઉ મ્યાઉ' અથવા MD તરીકે પણ ઓળખવામાં આવે છે, તે કૃત્રિમ ઉત્તેજક ટ્રવ્ય છે જે નાર્કોટિક ડ્રગ્સ એન્ડ સાયકોટ્રોપિક સબસ્ટન્સ (NDPS) એક્ટ હેઠળ પ્રતિબંધિત છે.