વર્ષ 2022નો અંતિમ દિવસ એટલે થર્ટી ફર્સ્ટ, 31 ડિસેમ્બરની ઉજવણીને લઈ ગુજરાતમાં દારુ-ડ્રગ્સ સહિતની બદી રોકવા માટે પોલીસ તંત્ર એલર્ટ બન્યું છે. થર્ટી ફર્સ્ટની ઉજવણી રાજ્યના અનેક સ્થળોએ નાની મોટી પાર્ટી યોજાતી હોય છે અને તેમાં નશાબંધીના લીરેલીરા ઉડતા જોવા મળે છે. ગુજરાતના તમામ પાડોશી રાજ્યોની સરહદે પોલીસ ઠેર ઠેર ચેકીંગ કરી રહી છે. જો કે સૌથી સતર્કતા અરવલ્લી જિલ્લા પોલીસ દ્વારા પણ સમગ્ર જિલ્લાને જોડતી રાજસ્થાન સરહદની રતનપુર સહિતની તમામ ચેક પોસ્ટ ઉપર સઘન ચેકીંગ હાથ ધરવામાં આવ્યું છે.

રતનપુર ચેકપોસ્ટ પર પોલીસ સતર્ક

ગુજરાતના બુટલેગરો માટે  માટે શામળાજી નજીકની રતનપુર ચેકપોસ્ટ, બોબીમાતા, મેઘરજની કાલીયા કુવા ઉંડાવા સહિતની ચેકપોસ્ટ સ્વર્ગ સમાન છે. અરવલ્લી જિલ્લા પોલીસ દ્વારા રાજસ્થાનમાંથી આવતા તમામ નાના મોટા વાહનોનું સઘન ચેકીંગ હાથ ધરવામાં આવ્યું છે. પોલીસ દ્વારા વાહનોમાં આવતા મુસાફરો તેમજ તેમાં ભરેલા માલસામાનની તપાસ કરવામાં આવી રહી છે. દારૂના બુટલેગરો માટે દારૂ ઘૂસાડવા માટે મુખ્ય પ્રવેશ દ્વાર ગણાતી આ ચેકપોસ્ટ ઉપર રાઉન્ડ ઘી ક્લોક ચોવીસ કલાક વાહનોનું સઘન ચેકીંગ કરી સતર્કતા રખાઈ રહી છે તેમજ રાજ્યમાં કોઈ અનિચ્છનીય બનાવ ન બને તે માટે તકેદારી રખાઈ રહી છે. અત્રે ઉલ્લેખનિય છે કે રાજસ્થાનની રતનપુર ચેક પોસ્ટ ઉપરથી પોલીસ દ્વારા વર્ષે કરોડો રૂપિયાનો દારૂ ઝડપવામાં આવે છે 

અમદાવાદ પોલીસ પણ એક્સનમાં

31 ડિસેમ્બરની ઉજવણીને લઈને અમદાવાદ પોલીસ કાયદો અને વ્યવસ્થા બાબતે સજ્જ બની છે. શાંતિપૂર્ણ માહોલમાં ઉજવણી થાય તે માટે અમદાવાદ શહેર પોલીસના 10,000 જેટલા પોલીસ જવાનો 4000 હોમગાર્ડ અને 15 જેટલી એસઆરપીની ટુકડી સુરક્ષામાં જોડાશે.  ઉજવણી માટે ફેવરેટ ગણાતા એવા સીજી રોડ, એસજી હાઇવે રીંગ રોડ રિવરફ્રન્ટ અટલબ્રીજ વગેરે જેવા મહત્વના સ્થાનો પર પોલીસ ખાસ નજર બનાવી રાખશે. થર્ટી ફર્સ્ટની ઉજવણી માટે ફેવરેટ ગણાતા એવા સીજી રોડ, એસજી હાઇવે રીંગ રોડ રિવરફ્રન્ટ, અટલબ્રીજ વગેરે મહત્વના સ્થાનો પર પોલીસ ખાસ નજર રાખશે. 

પોલીસ આધુનિક ઉપકરણોથી તપાસ કરશે

પોલીસ સુરક્ષા માટે બ્રિથ એનેલાઈઝર સિસ્ટમ અને ડ્રગ્સ ટેસ્ટિંગ કીટની મદદથી નશીલો પદાર્થ સેવન કરનાર લોકોની તપાસ પણ કરી શકશે. સાથે સાથે પોલીસ બૉડી વોર્ન કેમેરા અને ડ્રોનની મદદથી સુરક્ષાનું ધ્યાન રાખશે. પોલીસ અને મહિલા પોલીસ સિવિલ ડ્રેસમાં પણ અમદાવાદ શહેરની સુરક્ષા વ્યવસ્થા પર નજર રાખશે. અલગ અલગ ડ્રાઈવ ચાલે છે. નવા વર્ષેની ઉજવણી પહેલા અમદાવાદ શહેર પોલીસ પ્રોહિબીશન ડ્રાઈવ ચલાવી રહી છે.