અકસ્માતની ઘટનામાં ઘરખમ વધારો થયો છે અને તેમાં પણ આજકાલ તો હિટ એન્ડ રનના અનેક બનાવો સામે આવી રહ્યા છે. અકસ્માત સર્જી વાહન ચાલક ફરાર થઈ જાય છે. દારૂ પીને નશાની હાલતમાં વાહનચાલકો વાહન ચલાવતા હોય છે જેને કારણે અનેક વખત અકસ્માત સર્જાતા હોય છે. નશાની હાલતમાં બેફામ બનેલા વાહનચાલકોને પકડવાની કામગીરી પોલીસ કરતી હોય છે. આ તેમની જવાબદારીમાં આવે છે પરંતુ અમદાવાદમાં પોલીસ કર્મચારી દારૂ પીને પુરપાટ ઝડપે કાર ચલાવતો ઝડપાયો છે. બેફામ બનેલા નબીરાઓને પકડતી પોલીસ સામે જ સવાલો ઉભા થઇ રહ્યા છે. આ પોલીસકર્મીની ગાડીમાંથી દારૂની બોટલો પણ મળી આવી છે.  

નાના ચિલોડા પાસે અકસ્માત સર્જનાર પોલીસ કર્મી હતો!

અમદાવાદના નાના ચિલોડા કરાઈ કટ પાસે રાતના સમયે પૂરપાટ ઝડપે આવી રહેલા એક કાર ચાલકે અન્ય એક કાર અને એક્ટિવાચાલકને અડફેટે લીધા હતા, જેમાં એક્ટિવા ચાલકને ગંભીર ઈજાઓ પહોંચી હતી, જ્યારે અન્ય કારચાલકને પણ ઈજા પહોંચી હતી. કાર ચાલકની કાર પર પોલીસનું બોર્ડ લાગેલું હતું. અકસ્માત કરનાર કારચાલક પોલીસકર્મી હતો તથા દારૂ પીધેલી હાલતમાં હતો, જેની સામે નરોડા પોલીસે અકસ્માતના ગુનામાં સાપરાધ મન્યુષ્યવધનો ગુનો નોંધ્યો છે.

DCP સફીન હસન સહિતની ટીમ ઘટના સ્થળે પહોંચી!

1-2 દિવસ પહેલા રાત્રીના સાડા આઠ વાગ્યાની આસપાસ નાના ચિલોડા રોડથી અગોરા સર્કલ તરફ જવાના રસ્તે કરાઈ કટ પાસે હોન્ડા અમેઝ કાર પૂરપાટ ઝડપે આવી રહી હતી, જેમાં આગળ પોલીસની પ્લેટ લાગેલી હતી. તથા ગાડી પર સ્ટિકર પણ લાગેલું હતું. આ ગાડીના ચાલકે આગળ જઈ રહેલા અર્ટિકા અને એક્ટિવા ચાલકને અડફેટે લીધા. એમાં અન્ય કારચાલકને ઈજા પહોંચી હતી તથા એક્ટિવાચાલક દૂર સુધી ઢસડાયો હતો, જેને સમગ્ર શરીર પર ગંભીર ઈજાઓ પહોંચી હતી. એક્ટિવાનો કચ્ચરઘાણ બોલાવી ગયો હતો.ઘટનાના પગલે ટ્રાફિક DCP સફિન હસન સહિતની ટીમ ઘટના સ્થળે પહોંચી હતી 

ગાડીમાંથી બોટલ પણ મળી આવી !

બનાવની જાણ થતાં આસપાસના લોકો દોડી આવ્યા હતા. ઈજાગ્રસ્તોને સારવાર માટે હોસ્પિટલ ખસેડવામાં આવ્યા હતા. જ્યારે કારચાલકને લોકોએ પકડી પોલીસને સોંપ્યો હતો. અકસ્માત કરનારની કારમાંથી દારૂની બોટલો મળી આવી હતી. કારચાલક પણ દારૂ પીધેલી હાલતમાં મળ્યો હતો. અકસ્માત કરનારનું નામ ચિરાગ વાઘેલા અને વાડજનો રહેવાસી હોવાનું સામે આવ્યું હતું. અકસ્માતમાં એક્ટિવા ચલાવનાર પ્રણવ પટેલ ગંભીર રીતે ઈજાગ્રસ્ત છે, જેને હાથ, મોઢે તથા પગના ભાગે ઈજા પહોંચી છે.

નરોડા પોલીસે માનવવધનો ગુન્હો દાખલ કર્યો!

અકસ્માત કરનાર ચિરાગ વાઘેલા ગાંધીનગર પોલીસમાં એમ.ટી વિભાગમાં ફરજ બજાવે છે. દારૂ પીને બેફામ રીતે ગાડી ચલાવી અકસ્માત કર્યો એ બદલ નરોડા પોલીસે સાપરાધ મનુષ્યવધનો ગુનો નોંધ્યો છે. પોતે દારૂ પીધેલી હાલતમાં હોવા છતાં લોકોનો જીવ જઈ શકે એવી જાણ હોવા છતાં કૃત્ય કરવા બદલ કલમ 308 મુજબ ગુનો નોંધવામાં આવ્યો છે. આ ઉપરાંત દારૂની બોટલ મળી આવતાં એ મામલે પણ અલગથી ગુનો નોંધવામાં આવ્યો છે. નરોડા પોલીસે આરોપીની ધરપકડ કરી વધુ તપાસ શરૂ કરી છે.

અનેક પોલીસકર્મીઓ હશે જે નશાની હાલતમાં ગાડી ચલાવતા હશે!

ત્યારે સવાલ એ થાય છે કે આ પોલીસનો ટેગ લગાવીને ફરતા કેટલાય આવા લોકો હશે જે દારૂ પીને નશાની હાલતમાં બેફામ રીતે ગાડીઓ ચલાવી સામાન્ય માણસોને હેરાન કરતા હશે. એમના પર પણ પોલીસના ઉચ્ચ અધિકારીઓએ તપાસ કરી લગામ લગાવવાની જરૂર છે.આ તો કદાચ એક પોલીસ કર્મચારી છે જે અકસ્માત થયો એટલે ઝડપાઇ ગયો બાકી રાત્રીના સમયે અમદાવાદ શહેરમાં આવા નબીરાઓ ખુલ્લેઆમ નશાની હાલતમાં કાર અને બાઈક સાથે સ્ટન્ટ કરતા નજરે ચડતા હોય છે.આવા લોકોના કારણે શહેરના સામાન્ય માણસોમાં ડરનો માહોલ ઉભો થાય છે અને કાયદો અને વ્યવસ્થા પર પણ સવાલો ઉભા થાય છે. આશા છે કે અમદાવાદ અને ગાંધીનગરની પોલીસ આવા નબીરાઓને એવો પાઠ ભણાવશે કે બીજી વખત શહેરમાં ડરનો માહોલ ઉભો કરતા પહેલા એ પોતે પહેલા ડરે.