રાજ્યસભામાં રજૂ કરવામાં આવતા અનેક આંકડાઓ આપણને ચોંકાવી દે તેવા હોય છે. કેન્દ્ર સરકાર દ્વારા એક આંકડો જાહેર કરવામાં આવ્યો છે જેમાં છેલ્લા ત્રણ વર્ષ દરમિયાન કેટલી મહિલાઓ તેમજ છોકરીઓ ગુમ થઈ છે. આ આંકડો સાંભળીને અનેક લોકોની આંખો પહોળી થઈ જશે કારણ કે છેલ્લા ત્રણ વર્ષમાં 13 લાખથી વધુ મહિલાઓ તેમજ છોકરીઓ ગુમ થઈ છે. 2019થી 2021 દરમિયાન 18 વર્ષથી ઉપરની 10,61,648 જેટલી મહિલાઓ- છોકરીઓ લાપતા થઈ છે જ્યારે 18 વર્ષથી ઓછી ઉંમરની 2,51,430 છોકરીઓ દેશભરમાંથી ગુમ થઈ છે. 

વર્ષ 2019થી 2021 દરમિયાન આટલી મહિલાઓ થઈ લાપતા  

એક તરફ મહિલાઓની સુરક્ષાની વાતો આપણે કરતા હોઈએ છીએ. પરંતુ દેશભરમાં બાળકો ગુમ થવાની સંખ્યામાં વધારો જોવા મળી રહ્યો છે. વિવિધ પોલીસ સ્ટેશનમાં બાળકો ગુમ થયા હોવાની ફરિયાદો નોંધાવામાં આવી છે. રાજ્યસભામાં આ મામલે જવાબ રજૂ કરવામાં આવ્યો હતો અને તે આંકડો ચોંકાવનારો છે. સરકારી આંકડાઓ અનુસાર ૨૦૧૯ થી ૨૦૨૧ની વચ્ચે મધ્ય પ્રદેશમાંથી ૧,૬૦,૧૮૦ મહિલાઓ અને ૩૮,૨૩૪ છોકરીઓ લાપતા થઇ છે જ્યારે પશ્ચિમ બંગાળમાં ૧,૫૬,૯૦૫ મહિલાઓ અને ૩૬,૬૦૬ છોકરીઓ આ સમયગાળા દરમિયાન લાપતા થઇ છે. જો અન્ય રાજ્યોની વાત કરવામાં આવે તો મહારાષ્ટ્રમાં ૧,૭૮,૪૦૦ મહિલાઓ અને ૧૩,૦૩૩ છોકરીઓ લાપતા થઇ હતી. ઓડિશામાં ૭૦,૨૨૨ મહિલાઓ અને ૧૬,૬૪૯ છોકરીઓ ગુમ થઈ હતી. છત્તીસગઢમાં ૪૯,૧૧૬ મહિલાઓ અને ૧૦,૮૧૭ છોકરીઓ લાપતા થઈ છે તેવો આંકડો સરકાર દ્વારા રાજ્યસભામાં જાહેર કરવામાં આવ્યો છે. 

બાળતસ્કરી અંગેની આ રહી માહિતી 

દેશમાં મહિલાઓની તેમજ બાળકોની સુરક્ષા અંગે અનેક કાયદાઓ લાવવામાં આવ્યા છે. પરંતુ અનેક બાળકો ગુમ થયા છે અને સરકારી ચોપડે તેમના ગુમ થયા હોવાની ફરિયાદ નોંધાઈ છે. મહત્વનું છે કે બાળ તસ્કરીના ગુન્હાઓમાં ધરખમ વધારો જોવા મળી રહ્યો છે. બાળતસ્કરી અંગેની વાત કરીએ વર્ષ 2016થી 2022ની વચ્ચે બાળકોની તસ્કરી બિહાર, ઉત્તર પ્રદેશ તેમજ આંધ્ર પ્રદેશ ટોચ પર આવે છે.