ભારત સહિત વિશ્વના અબજોપતિઓનાં કાળાનાણા છુપાવવા માટે કુખ્યાત સ્વિસ બેંકોમાં જમા રાખવામાં આવતી રકમમાં ગયા વર્ષે મોટો ઘટાડો જોવા મળ્યો છે.  ભારતીયો અને કંપનીઓની રકમ 11 ટકા ઘટીને 3.42 અબજ સ્વિસ ફ્રેંક (લગભગ રૂ. 30,000 કરોડ) થઈ ગઈ છે. સ્વિટ્ઝરલેન્ડની સેન્ટ્રલ બેંકે ગુરુવારે આ માહિતી આપી છે. સ્વિસ સેન્ટ્રલ બેંક SNBના આંકડા અનુસાર, વર્ષ 2022માં સ્વિસ બેંકોમાં રાખવામાં આવેલા ભારતીય ગ્રાહકોનું કુલ ભંડોળ 11 ટકા ઘટીને 3.42 અબજ ફ્રેંક રહી ગયું છે. આના એક વર્ષ પહેલા, 2021 માં, ભારતીય ગ્રાહકોએ સ્વિસ બેંકોમાં 3.83 અબજ સ્વિસ ફ્રેંકની રકમ જમા રાખી હતી, જે 14 વર્ષની સર્વોચ્ચ સપાટી હતી.

થાપણોમાં ગયા વર્ષે  34 ટકા ઘટાડો નોંધાયો

આ ઉપરાંત સ્વિસ બેંકોમાં ભારતીયો દ્વારા જમા કરવામાં આવેલી રકમ પણ ગયા વર્ષે લગભગ 34 ટકા ઘટીને 39.4 કરોડ ફ્રેંક થઈ ગઈ છે. આ પહેલા, 2021 માં, તે 7 વર્ષની ઊંચી સપાટી 60.2 કરોડ ફ્રેંક પર હતી. સ્વિસ બેંકો દ્વારા સ્વિસ નેશનલ બેંક (SNB)ને આપવામાં આવેલી માહિતીના આધારે જાહેર કરવામાં આવેલા ડેટામાં ભારતીય ખાતાધારકો દ્વારા જમા કરાયેલા કથિત કાળા નાણાંનો કોઈ ઉલ્લેખ નથી. આ આંકડાઓમાં ત્રીજા દેશથી સંબંધિત કંપનીઓના નામે સ્વિસ બેંકોમાં જમા રકમનો પણ સમાવેશ થતો નથી.

વર્ષ 2022માં 342.4 કરોડ સ્વિસ ફ્રેંક જમા હતા  

SNB અનુસાર, વર્ષ 2022 ના અંતે, ભારતીય ગ્રાહકો પ્રત્યે સ્વિસ બેંકોની કુલ જવાબદારી 342.4 કરોડ સ્વિસ ફ્રેંક હતી. તેમાંથી 39.4 કરોડ સ્વિસ ફ્રેંક ડિપોઝિટના રૂપમાં હતા, જ્યારે 110 કરોડ ફ્રેંક અન્ય બેંકો દ્વારા સ્વિસ બેંકોમાં પહોંચ્યા હતા. વધુમાં, 2.4 કરોડ  ફ્રેંક જવાબદાર વ્યક્તિઓ અથવા ટ્રસ્ટો પાસે હતા, જ્યારે 189.6 કરોડ ફ્રેંક ગ્રાહકો વતી બોન્ડ્સ, સિક્યોરિટીઝ અને અન્ય નાણાકીય સાધનોના રૂપમાં બેંકો પાસે રાખવામાં આવ્યા હતા.

2006માં 6.5 બિલિયન ફ્રેંકના રેકોર્ડ સ્તરે હતી ડિપોઝીટ

ગયા વર્ષે, સ્વિસ બેંકો પાસે ભારતીયોની સંપત્તિના ચાર જૂથોમાંથી, માત્ર જવાબદાર વ્યક્તિઓ અને ટ્રસ્ટ સેગમેન્ટમાં વધારો જોવા મળ્યો હતો. અન્ય તમામ ત્રણ વિભાગો- અન્ય બેંકો અને બોન્ડ્સ અને સિક્યોરિટીઝ સેગમેન્ટ દ્વારા મુકવામાં આવેલી થાપણોમાં ઘટાડો નોંધાયો છે. 2006માં સ્વિસ બેંકોમાં ભારતીયો દ્વારા રાખવામાં આવેલી કુલ રકમ 6.5 બિલિયન ફ્રેંકના રેકોર્ડ સ્તરે હતી, ત્યારબાદ તેમાં વત્તા-ઓછા પ્રમાણમાં ઘટાડો થયો છે. આ સમયગાળા દરમિયાન માત્ર 2011, 2013, 2017, 2020 અને 2021માં જ સ્વિસ બેંકોમાં ભારતીય ગ્રાહકોની સંખ્યામાં વધારો થયો હતો.