બિપોરજોયને કારણે રાજ્યમાં વરસાદી માહોલ જામ્યો હતો. અનેક જિલ્લાઓમાં ધોધમાર વરસાદ વરસ્યો હતો જેને કારણે મોટા પાયે નુકસાન પણ થયું છે. ગુજરાતથી બિપોરજોય વાવાઝોડું આગળ નીકળી ગયું પરંતુ ચોમાસાની સિસ્ટમ પર અસર કરતું ગયું. આમ તો આ સમય દરમિયાન મુખ્યત્વે ચોમાસું બેસી જતું હોય છે પરંતુ આ વખતે ચોમાસા માટે રાહ જોવી પડશે તેવી આગાહી કરવામાં આવી છે. મહત્વનું છે કે કેરળમાં તો ચોમાસું બેસી ગયું છે પરંતુ રસ્તામાં તે અટવાઈ ગયું છે.  

આ જગ્યાઓ પર વરસી શકે છે વરસાદ

ગુજરાતમાં ગરમીનો અહેસાસ લોકોને થઈ રહ્યો છે. બિપોરજોય વાવાઝોડાને કારણે વાતાવરણમાં પલટો તો આવ્યો હતો પરંતુ તે પસાર થયા બાદ ફરી એક વખત તાપમાનનો પારો વધી રહ્યો છે જેને કારણે ગરમીનો અનુભવ લોકોને થઈ રહ્યો છે. ત્યારે ચોમાસાને લઈ રાજ્યના લોકોએ રાહ જોવી પડશે તેવી આગાહી હવામાન વિભાગ દ્વારા કરવામાં આવી છે. વાવાઝોડાને કારણે ચોમાસાની સિસ્ટમ વેરવિખેર થઈ ગઈ છે. જેને કારણે વરસાદ માટે ગુજરાતીઓએ રાહ જોવી પડશે. હવામાન વિભાગની આગાહી અનુસાર એક સપ્તાહ બાદ ગુજરાતમાં વરસાદનું આગમન થઈ શકે છે. હવામાન વિભાગની આગાહી અનુસાર આગામી 3-4 દિવસ દરમિયાન સુરત, વલસાડ, ભરૂચ, નર્મદા, છોટા ઉદેપુર તેમજ વડોદરામાં હળવો વરસાદ વરસી શકે છે.       

ગયા વર્ષ કરતા આ વખતે મોડું છે ચોમાસુ!

ગુજરાતમાં ગયા વર્ષે વિધિવત રીતે ચોમાસાની શરૂઆત થઈ ગઈ હતી પરંતુ આ વખતે ગયા વર્ષની સરખામણી કરતા વધારે રાહ જોવી પડશે. મહિનાના અંત સુધીમાં અનેક જિલ્લાઓમાં વરસાદ આવી શકે છે. આવનાર અઠવાડિયામાં ગુજરાતના પૂર્વ વિસ્તારોમાં ચોમાસાની શરૂઆત થઈ જશે. જે બાદ ધીરે ધીરે ચોમાસુ આગળ વધશે પરંતુ કઈ પેટનમાં આગળ વધશે તે અંગે અસમંજસ છે.  

અંબાલાલ પટેલે વરસાદને લઈ કરી આગાહી!

વરસાદને લઈ હવામાન નિષ્ણાંત અંબાલાલ પટેલે પણ આગાહી કરી છે. 25થી 30 જૂનની વચ્ચે રાજ્યના અનેક ભાગોમાં વરસાદનું આગમન થઈ ચૂક્યું હશે. ભારે વરસાદની શક્યતા વ્યક્ત કરવામાં આવી છે. અંબાલાલ પટેલની આગાહી મુજબ નર્મદા વિસ્તારમાં ભારે વરસાદ વરસી શકે છે. તે સિવાય સુરતના અનેક ભાગોમાં વરસાદની સંભાવના વ્યક્ત કરવામાં આવી છે. 5 જુલાઈ સુધીમાં સૌરાષ્ટ્ર તેમજ કચ્છના ભાગોમાં પણ વરસાદની આગાહી કરવામાં આવી છે. આવનાર સમયમાં વરસાદી સિસ્ટમ સક્રિય થશે અને ગુજરાતના અનેક ભાગોમાં વરસાદ થશે.