મહારાષ્ટ્રના થાણે જિલ્લામાં જમીન વિવાદમાં મુખ્ય પ્રધાન એકનાથ શિંદેના નેતૃત્વવાળી શિવસેનાના એક નેતા મહેશ ગાયકવાડની ગોળી મારીને ઘાયલ કરવા બદલ ભારતીય જનતા પાર્ટી (BJP)ના ધારાસભ્યની ધરપકડ કરવામાં આવી છે. એડિશનલ પોલીસ કમિશનર દત્તાત્રેય શિંદેએ મીડિયાને જણાવ્યું કે કલ્યાણના બીજેપી ધારાસભ્ય ગણપત ગાયકવાડે શુક્રવારે રાત્રે ઉલ્હાસનગર વિસ્તારમાં હિલ લાઇન પોલીસ સ્ટેશનના સિનિયર ઇન્સ્પેક્ટરના રૂમની અંદર શિવસેનાના કલ્યાણ યુનિટના વડા મહેશ ગાયકવાડ પર ગોળીબાર કર્યો હતો.

ભાજપના ધારાસભ્યએ શું કહ્યું?

તેમની ધરપકડ પહેલા, ગણપત ગાયકવાડે એક ન્યૂઝ ચેનલને ફોન પર જણાવ્યું હતું કે તેમના પુત્રને પોલીસ સ્ટેશનમાં મારવામાં આવી રહ્યો છે તેથી તેણે ગોળીબાર કર્યો હતો. તેમણે આરોપ લગાવ્યો કે મુખ્યમંત્રી એકનાથ શિંદે મહારાષ્ટ્રમાં "ગુનેગારોનું સામ્રાજ્ય" સ્થાપિત કરવાનો પ્રયાસ કરી રહ્યા છે. મહેશ ગાયકવાડને પહેલા સ્થાનિક હોસ્પિટલમાં લઈ જવામાં આવ્યા હતા જ્યાંથી તેને થાણેના એક ખાનગી મેડિકલ સેન્ટરમાં લઈ જવામાં આવ્યા હતા.

ઝગડાનું કારણ શું હતું?

અધિક પોલીસ કમિશનર દત્તાત્રેય શિંદેના જણાવ્યા અનુસાર, ધારાસભ્ય અને શિવસેનાના નેતા વચ્ચેની લડાઈ દરમિયાન, ગણપત ગાયકવાડે વરિષ્ઠ નિરીક્ષકની ચેમ્બરની અંદર મહેશ ગાયકવાડ પર કથિત રીતે ગોળીબાર કર્યો હતો, જેમાં તેઓ અને તેમના સાથીદારને ઈજા થઈ હતી. ગણપત ગાયકવાડે એક ન્યૂઝ ચેનલને કહ્યું, “હા, મેં મારી જાતે ગોળી મારી છે. મને કોઈ અફસોસ નથી. જો મારા પુત્રને પોલીસ સ્ટેશનની અંદર પોલીસની સામે મારવામાં આવે છે, તો હું શું કરીશ?'' તેણે દાવો કર્યો કે તેણે પાંચ ગોળીઓ ચલાવી. ભાજપના ધારાસભ્યએ આક્ષેપ કર્યો હતો કે મુખ્યમંત્રી એકનાથ શિંદે "મહારાષ્ટ્રમાં ગુનેગારોનું સામ્રાજ્ય બનાવવાનો પ્રયાસ કરી રહ્યા છે." ભાજપ અને શિંદેની આગેવાની હેઠળની શિવસેના મહારાષ્ટ્રમાં શાસક ગઠબંધનનો ભાગ છે. પોલીસે ગણપત ગાયકવાડ ઉપરાંત અન્ય બે લોકોની પણ ધરપકડ કરી છે.

જમીન હતી વિવાદનું કારણ ?

ગોળીબારના કારણે થયેલા જમીન વિવાદ અંગે ગણપત ગાયકવાડે જણાવ્યું હતું કે તેમણે 10 વર્ષ પહેલા જમીનનો પ્લોટ ખરીદ્યો હતો. તેમણે કહ્યું કે કેટલીક કાનૂની સમસ્યાઓ હતી પરંતુ તે કોર્ટમાં કેસ જીતી ગયો હતો. તેણે આરોપ લગાવ્યો કે મહેશ ગાયકવાડે તેને બળજબરીથી કબજે કર્યું. ધારાસભ્યએ કહ્યું કે તેમનો પુત્ર જમીન સંબંધી ફરિયાદ નોંધાવવા ઉલ્હાસનગર પોલીસ સ્ટેશન ગયો હતો.